Արդարադատության նորանշանակ նախարար Հրայր Թովմասյանն այլևս իր սիրած գործով չի զբաղվի` կնոջ հետ չի գնա գնումներ կատարելու: «Ողղակի ժամանակ չկա: Երեկ ես էլ կնոջս հետ խոսում էի ու ասում, որ ինքն է այսուհետև գնումներ կատարելու: Դա իմ սիրած գործն էր, ես տուն գնալուց առաջ զանգում էի ու հարցնում` ինչ պետք է գնել այսօր: Այդպես հավանաբար էլ չեմ անի», -այսօր նոր քաղաքապետ Կարեն Կարապետյանի երդման արարողությունից հետո լրագրողների հետ զրույցում անկեղծացավ Հրայր Թոմասյանը:
Նոր նախարարի առաջին քայլը լինելու է համակարգին ծանոթանալը, տեսնել «ում հետ ես աշխատում և այլն»: Իսկ հեռահար նպատակներից է այնպես անել, որ հնարավորինս նվազեցվի պետական չինովնիկի ու քաղաքացու անմիջական շփումը: «Դա վերաբերում է նաև քրեակատարողական հիմնարկներին», -հավելեց Հրայր Թովմասյանն ու ասաց, որ այդ ուղղությամբ անպայմանորեն քայլեր կարվեն:
Նրա խոսքով, իր պաշտոնում կարճաժամկետ լուծումներ չի գտնի երբեք: «Նման լուծումները, որպես կանոն, կամ նախարարի հեռանալուց կամ նրա պաշտոնավարման հաջորդ ամիսներին վերանում են: Կփորձեմ երկարաժամկետ լուծումներ գտնել ու ստեղծել այնպիսի համակարգեր, որոնք կաշխատեն ինքնուրույն և նախարարի փոփոխության պարագայում այնպիսի ինտիտուցիոնալ երաշխիքներ կլինեն, որոնք թույլ կտան այդ համակարգերին աշխատել»,-բացատրեց նախարարը:
Նրա խոսքով, ինչպես լինում է մարդ, այնպես էլ մնում է ու հետևողական անսկզբունքային մարդը չի կարող դառնալ հակառակը:
«40 տարեկան դարձած անսկզբունքային մարդը չի կարող փոխվել կամ լավ մարդը չի կարող վատը լինել: Հետևաբար նախարար դառնալուց հետո իմ անձնական որակները չեն փոխվի», -վստահեցրեց նոր նախարարը: Նրա խոսքով, պետական չինովնիկի իմիջը լավ պահելը բոլոր ժամանակների խնդիր է: «Այդ ուղղությամբ քայլեր կկատարվեն», -վստահեցրեց նա:
Հիշեցնենք, որ դեկտեմբերի 17-ին նախագահ Սարգսյանի հրամանագրով Հրայր Թովմասյանը նշանակվեց արդարադատության նախարար: Նոր նախարարն աշխատանքի է անցել դեկտեմբերի 18-ից:
/Panorama.am/
|