Բնապահպանության նախարար Արամ Հարությունյանն
այսօր Սևանա լճի հիմնահարցերի լուծման ուղղությամբ 2010թ. իրականացված
միջոցառումների և 2011թ. նախատեսված աշխատանքների վերաբերյալ ՀՀ նախագահի
հետ ունեցած հանդիպումից հետո լրագրողների հետ զրույցում ասաց, որ
նախագահին ներկայացվել են 2010-ին կատարված բոլոր աշխատանքները:
Ըստ նախարարի, ձեռք բերված նոր տեխնիկաների շնորհիվ հաջողվել է ջրում ու
ափամերձ տարածքներում 91 հա տարածք մաքրել: Իսկ անհատ ձեռներեցների ու
իրավաբանական անձնանց հետ կնքած 16 պայմանագրերի համաձայն, մաքրվել է ևս 83
հա տարածք:
Նախարարի խոսքով, քարտեզագրման աշխատանքների համաձայն ևս 3 հազար հա տարածք պետք է մաքրվի:
«Խնդիրը, որ դրված է մեր առջև, հետևյալն է. մինչև ջրի մակարդակը հասնի
1900 նիշի, մենք պետք է մաքրման աշխատանքներն առաջնահերթ իրականացնենք
ջրում ու ճահճացաված տարածքներում: Ըստ այդմ, 2011-ի համար նախատեսել ենք
283 հա մաքրման աշխատանքներ իրականացնել նախատեսված 124 միլիոն դրամի
սահմաններում»,-ասաց նա:
Բացի այդ, Ա. Հարությունյանը նշեց, որ պայմանագրային հիմունքներով
մաքրման աշխատանքներ են իրականացվելու ցամաքային տարածքում: Մաքրման
աշխատանքներ նաև նախատեսվում են իրականացնել օգնության, բարեգործական
հիմուքններով ակցիաների շրջանակներում:
Բնաահպանության նախարարը հիշեցրեց, որ ՀՀ նախագահը հանձնարարել է այս
տարի բացթողնվող մանրաձկան քանակն ավելացնել ու հատուկ ուշադրություն
դարձնել, մարզպետարանի հետ համատեղ հսկողության տակ առնել ոչ միայն
ծառամաքրման աշխատանքները, այլև` ջրի մակարդակի բարձրացման հետևանքով
շինությունների ապամոնտաժման հարցը:
Ա. Հարությունյանը նշեց, որ այս տարվա փետրվարի վերջի տվյալներով,
«Սևան» ազգային պարկի տրամադրության տակ եղած 1905 կառուցապատման նիշից
ցածր գտնվող 30 շինություններից ապամոնտաժվել է 28-ը:
«Մենք` որպես պետական կառույց, մեր օրինակով շենք-շինություններն ապամոնտաժել ու տեղափոխել ենք»,-ասաց նա:
Ա. Հարությունյանը նշեց, որ նախագահի հանձնարարականով, Սևանա լճի
ափամերձ տարածքներում հասարակական` անվճար լողափներ են ստեղծվելու:
Այսինքն` նախարարը բացատրեց, որ հատկապես կենտրոնական մասերում գտնվող
լողափները հասարկական են լինելու ու այնպիսի պայմաներով, որ քաղաքացիները
կարողանան իրենց հանգիստը կազմակերպել:
/Panorama.am/
|