Ադրբեջանի պաշտպանության նախարար Սաֆար Աբիևի` կադրերի և զինվորական կրթության գծով տեղակալ, գեներալ-լեյտենանտ Չինգիզ Մեմմեդովի` Բաքիխանովի ավանում գտնվող 4 հարկանի առանձնատան չհիրկիզվող պահարանից ընդհանուր առմամբ 12 մլն մանաթ (15 մլն դոլար) արժողությամբ փող և ոսկյա զարդեր է գողացվել:
Թեև հանցագործությունը կատարվել է 2010 թ-ի սեպտեմբերի 19-ին, նախկինում դատապարտված, այդ գործով կասկածյալներ Շաիգ Սաթթարովը և Փերվին Մեմմեդովը ձերբակալվել են ս.թ. մարտի 16-ին:
«Ենի Մուսավաթ»-ը հայտնում է, որ թեև պաշտոնապես հայտարարվել է, որ գողոնի արժեքը կազմում է 250 հազար մանաթ (300 հազար դոլար), սակայն, իրականում փոխնախարարի չհիրկիզվող պահարանում 12 մլն մանաթ (15 մլն դոլար) արժողությամբ հարստություն է եղել, իսկ գողունի իրական արժեքն իջեցվել է` հասարակությանը չգրգռելու համար:
Թերթը պարզել է, որ ՊՆ փոխնախարարի ամսական աշխատավարձը կազմում է 1500-1700 մանաթ (մոտ 2000 դոլար), և 20 տարի գտնվելով այդ պաշտոնում, առանց ծախսելու, նա կկարողանար հավաքել միայն 300 հազար մանաթ (360 հազար դոլար):
Անունը հիշատակել չցանկացած ռազմական փորձագետներն ասել են, որ Չ. Մեմմեդովը ղեկավարում է զինակոչի բաժինը և այդ ոլորտից նա ամսական մեծ չափի եկամուտ ունի: «Տարեկան 50-60 հազար զինակոչիկ է լինում: Եթե դրանց 20-30 տոկոսը 2-3 հազար կաշառք վճարի` այսպես կոչված լավ տեղ ընկնելու համար, դա կկազմի տարեկան 2-3 մլն մանաթ: Այդ տեսակետից, փոխնախարարի տանից 12 մլն արժողությամբ հարստություն գողացվելը զարմանալի չէ», -ասել են նրանք:
Մի շարք իրավապաշտպաններ էլ ասել են, որ նման գործողությունները պաշտոնեական հանցագործություն են համարվում, և այդ գործողությունները կատարած պաշտոնյաներին 7-ից 12 տարվա ազատազրկման պատիժ է սպասվում:
/Panorama.am/
| 
