Գարնանային ջրհեղեղներից տուժած Քուր գետի ափամերձ բնակավայրերում հիմնովին վնասված ենթակառուցվածքները դեռևս չեն վերականգնվել: Այս մասին իրենց մտահոգությունն են բարձրաձայնել ջրհեղեղներից տուժած 4 շրջանների բնակիչները:
«Քուր» ՀԿ-ի կողմից ջրհեղեղից տուժած բնակչության շրջանում անցկացված հարցման արդյունքում ստացվել է հետևյալ պատկերը. անհրաժեշտ է վերականգնել ճանապարհները, հիվանդանոցները, դպրոցները, ջրատար խողովակները: Այս մասին հաղորդում է «Թուրան» գործակալությունը:
Ընդհանուր առմամբ` հարցմանը մասնակցածների 78 տոկոսը բացասական վերաբերմունք ունի աղետի գոտու ենթակառուցվածքների վերականգնման ուղղությամբ կառավարության ձեռնարկած յուրաքանչյուր քայլի նկատմամբ, իսկ 88 տոկոսը դժգոհ է պետության կողմից տրված դրամական փոխհատուցումից:
Աղբյուրի փոխանցմամբ` փոխհատուցումը դժգոհություն է առաջացրել ոչ միայն գումարների քիչ լինելու պատճառով, այլև անարդարացի բաշխման համար, այսինքն` տուժած քաղաքացիներից շատերը չեն ստացել կառավարության կողմից նախատեսված յուրաքանչյուր ընտանիքին հատկացվող 200 մանաթը: Դրա վառ ապացույցը, ըստ «Քուր» ՀԿ-ի, այն է, որ հարցվածների 83 տոկոսը տեղյակ չի եղել գումարի չափի մասին, այսինքն` ստացել են ավելի քիչ, քան 200 մանաթն է, իսկ 46 տոկոսը` ընդհանրապես չի ստացել գումարային փոխհատուցում:
/Aysor.am/
| 
