Մարտի 11-ից Ադրբեջանում սկսված բողոքի ակցիաների ալիքը գնալով նոր թափ է հավաքում: Այդ երկրի ամենամեծ ընդդիմադիր քաղաքական ուժի կենտրոն Հասարակական պալատը, որն իրեն համարում է Ադրբեջանի այլընտրանքային խորհրդարան, ապրիլի 2-ին բողոքի զանգվածային ակցիա է նշանակել: Նկատի ունենալով այն հանգամանքը, որ Հասարակական պալատի կազմում ընդգրկված են «Մուսավաթ», «Ժողճակատ», «Դասական ժողճակատ», «Ազգային անկախություն» կուսակցություններն, ինչպես նաև այլ կուսակցությունների, հասարակական կազմակերպությունների ներկայացուցիչներ, անկախ մտավորականներ, պատգամավորության նախկին թեկնածուներ, ենթադրվում է, որ Բաքվի կենտրոնում անցկացվելիք ապրիլի 2-ի բողոքի ակցիային կմասնակցեն Ադրբեջանի բռնակալական իշխանությունից դժգոհ խոշոր զանգվածներ: Այս մասին գրում է «Ենի Մուսավաթ» թերթը` նշելով, որ հիշյալ կուսակցությունների ղեկավարությունը հայտարարել է, որ ապրիլի 2-ի միտինգը ցնցելու է իշխանությանը և հանդիսանալու է Ադրբեջանի իշխանության վերջի սկիզբը:
«Զանգվածային ակցիաների շղթայական բնույթ ստանալու և ընդդիմադիր կուսակցությունների` միասին ակցիա անցկացնելու մասին որոշում ընդունելու իրողությունը խիստ անհանգստացրել է իշխանությանը: Իշխանական ճամբարը խուճապի մեջ է: Ընդդիմադիր ճամբարում էլ ոգեշնչվածության մակարդակն այնքան բարձր է, որ արդեն խոսում են սպասվող հեղափոխության գույնից: Երեկ Բաքվում լուրեր են տարածվել, որ մի խումբ ընդդիմադիր երիտասարդներ, որոնք իրենց 2011 թ-ի հեղափոխության ծիծեռնակներն են համարում, առաջիկա հեղափոխության գույնն առաջարկել են ընտրել կարմիրը: «Pia.az» կայքն էլ հայտնել է, որ արդեն Թուրքիայի ֆաբրիկաներից մեկում առաջիկա բողոքի ակցիաների մասնակիցների համար 100 հազարից ավելի կարմիր գույնի տարբեր արտահագուստներ են պատվիրվել: Ասվում է, որ անգամ արդեն փոխանցվել է պատվերի համար անհրաժեշտ գումարը և այն պատրաստ լինելուն պես բերվելու է Ադրբեջան»,- գրում է թերթը:
«Ենի Մուսավաթը» նաև հիշեցրել է, որ 2005 թ-ի իրադարձությունների ժամանակ հեղափոխության համար նարնջագույնն ընտրած ադրբեջանական ընդդիմությունը, արտահագուստից բացի, քարոզչության համար եղբայրական Թուրքիայից նույնիսկ հատուկ ավտոբուս էլ էր պատվիրել: Սակայն այդ քարոզչական ավտոբուսին թույլ չի տրվել մտնել Ադրբեջանի տարածք և հրդեհվել է Վրաստանի տարածքում:
/Panorama.am/
|
