Ադրբեջանի ռազմարդյունաբերության նախարար Յավեր Ջամալովի և պաշտպանության նախարար Սաֆար Աբիևի միջև առանց այն էլ խնդիրնելով լի հարաբերություններն էլ ավելի լարվել են և հասել առճակատման: Նրանց միջև մրցակցությունը գնում է «յուղոտ» հայտամրցույթների շուրջ, իսկ կռվախնձորը պաշտպանության նախարարության հաշվեկշռում գտնող երկու գործարաններն են, որոնք Յ. Ջամալովը ցանկանում է մտցնել իր նախարարության կազմ: Այս մասին գրում է «Ենի Մուսավաթ» թերթը:
Խոսքը տանկերի վերանորոգման և ավիացիոն վերանորոգման գործարանների մասին է, որոնք ռազմարդյունաբերության նախարարությունը ծրագրում է մոտ ժամանակում փոխադրել իր հաշվեկշիռ: Սա նշանակում է, որ բանակում ընթացող վերանորոգման-արդիականացման բոլոր նախագծերը պետք է անցնեն Յ. Ջամալովի վերահսկողության տակ: Ամեն տարի պետությունը ռազմական տեխնիկայի վերանորոգման և արդիականացման համար միլիոնավոր դոլարների ֆինանսական միջոցներ է հատկացնում, և այժմ այդ միջոցները պետք է տնօրինի ռազմարդյունաբերության նախարարը: Թերթի փոխանցմամբ, Յ. Ջամալովին հաջողվել է այդ գործարաններն իր վերահսկողությանը հանձնելու հարցը համաձայնեցնել երկրի ղեկավարության հետ:
Վերջին տարիներին ՊՆ դեմ կոմպրոմատներ հավաքած Յ. Ջամալովի և Ս. Աբիևի միջև որոշ խնդիրներ են ծագել: Յ. Ջամալովը հասել է նրան, որ իշխանությունը ստիպի Ս. Աբիևին աշխատել ռազմարդյունաբերության նախարարության հետ և ՊՆ կարիքների համար անհրաժեշտ մթերքը գնել ոչ թե արտասահմանից, այլ տեղական ձեռնարկություններից: ՊՆ «յուղոտ» երկու «հիմնական օբյեկտները» հանդիսացող այդ գործարարանները ձեռք բերելու Յ. Ջամալովի գործողությունները խզել են Ս. Աբիևի հետ հարաբերությունները:
Ադրբեջանի նախագահի հետ մոտ հարաբերություններն ու ազդեցության լծակները գործի դրած Յ. Ջամալովը հասել է նրան, որ ՊՆ-ն վերջ է դրել իր ռազմական տեխնիկան Վրաստանում և Ուկրաինայում վերանորոգելու սովորույթին: Իսկ դա համարվում է դիպուկ հարված Ս. Աբիևին:
«Մի քանի շաբաթ առաջ տեղեկություն է տարածվել, որ Ադրբեջանն անցնում է զինված ուժերում կենտրոնացված հայտամրցութային գործառույթների` Թուրքիայում գործողության մեջ դրվելիք համակարգին, որը պետք է գործի ոչ թե ՊՆ, այլ պաշտպանական արդյունաբերության նախարարության տնօրինության տակ:
Նոր համակարգով ՊՆ, պետական սահմանային ծառայության, ներքին զորքերի, ազգային գվարդիայի, արդարադատության նախարարության գնդի և ռազմականացված կառույցների տեխնիկական մատակարարման հետ կապված հայտամրցույթները, ընկերությունների ընտրությունը, զինավառման հարցերը, շինարարական գործերը և այլ որոշումները պետք է ընդունի ռազմարդյունաբերության նախարարությունը: Իսկ դա նշանակում է, որ Յ.Ջամալովը իր ձեռքն է վերցնում Ս. Աբիևի պետական խորհրդանիշով անձնական բիզնեսի նշանակալի մասը»,- գրում է «Ենի Մուսավաթը»:
/Panorama.am/
| 
