Ադրբեջանի կառավարությունը կարգադրել է թուլացնել Իրանի հետ ունեցած տնտեսական և առևտրային հարաբերությունները, փոխարենը` Ադրբեջանը սերտ տնտեսական հարաբերություններ է զարգացնում Իսրայելի հետ: Այդ մասին տեղեկացնում է իրանական «աթինյուզ.քոմ» կայքը:
«Ադրբեջանի մաքսային ծառայության աշխատակիցները արգելում են քաղաքացիներին 10կգ-ից ավելի մթերք ներկրել Իրանից, այն դեպքում, որ կառավարության որոշմամբ` թույլատրելի չափը 50 կգ է: Այն քաղաքացիները, որոնք 10կգ-ից ավելի մթերք են ներկրում, տուգանվում են: Այդ առթիվ վերջին օրերին Ադրբեջանի Հանրապետության 100-ավոր քաղաքացիներ բողոքի ցույց են կազմակերպել Ասթարայի քաղաքապետարանի առջև»,-նշում է իրանական կայքը:
Հիշեցնենք, որ իրանական «արաննյուզ.իռ» կայքը հաղորդել էր, որ Ադրբեջանի Ասթարայի սահմանային անցակետի աշխատակիցները խնդիրներ են ստեղծում այն ադրբեջանցիների համար, որոնք ցանկանում են մեկնել Իրան, և ադրբեջանցի պաշտոնյաների նպատակն այն է, որպեսզի հնարավորինս քիչ քաղաքացիներ այցելեն Իրան:
Նույն կայքի հաղորդմամբ`օրերս Ադրբեջանի ոստիկանությունը Ասթարայի մաքսատանը ձերբակալել էր Իրանի կրոնական Ղոմ քաղաքում իսլամ սովորող Ադրբեջանի Հանրապետության քաղաքացի հանդիսացող 40 ուսանողի, որոնք Նովուռուզի նպատակով մեկնում էին իրենց երկիր:
/Panorama.am/
|