Մարտի 11-ին Բաքվում անցկացված միտինգի կազմակերպիչների մեջ «AZAD» միության անդամներ էլ են եղել: Միության կողմից սոցիալական ցանցերով օրերս տարածված տեղեկության մեջ ասվում է, որ երիտասարդները ապրիլի 11-ին միտինգ են նշանակել Բաքվում: Ասվում է, որ «ընդհանրապես, ամեն ամսվա 11-ը Ադրբեջանում ավտորիտար վարչակարգի դեմ երիտասարդների դիմադրության օր է հայտարարվում»:
Ինչպես հայտնի է, մոտ 30 երիտասարդ անցած շաբաթ Վաշինգտոնում Ադրբեջանի դեսպանատան առաջ բողոքի ակցիա են ացնկացրել: «Pia.az»-ին տեղեկություններով, երկու ժամ տևած ակցիան կազմակերպել է ԱՄՆ-ում բնակվող ադրբեջանցիների «AZAD» միությունը: Պիկետում «Վերջ դիկտատուրային», «Ազատություն Ադրբեջանին», «Կորչի միապետությունը» բովանդակությամբ լոզունգներ են հնչել:
Պիկետի մասնակիցները պահանջել են ազատ արձակել ձերբակալված երիտասարդ ակտիվիստներ Բախտիյար Հաջիևին, Ջաբբար Սավալանին, Դեյանեթ Բաբաևին և լրագրող Էյնուլլա Ֆաթուլլաևին: Նրանք պահանջել են նաև վերջ դնել Ադրբեջանում ապօրինություններին, քաղաքացիների իրավունքների և ազատությունների ոտնահարումներին, բիզնեսի հետապնդումներին:
Պիկետի ավարտին «AZAD» միավորման անդամները ջանացել են հայտարարություն և մի կտոր օճառ հանձնել Ադրբեջանի դեսպանատանը, սակայն դեսպանատան աշխատակիցները դուռը չեն բացել:
/Panorama.am/
|