«Թուրան» լրատվական գործակալության տեղեկացմամբ՝ Ռազմական լրագրողների «Դոկտրինա» կենտրոնի ղեկավար Ջասուր Սումերենլիին այսօր կայացած մամուլի ասուլիսում հայտարարել է, որ ադրբեջանական բանակում ոչ կանոնադրական հարաբերությունների արդյունքում արձանագրվող զոհերի թիվը աճում է: 2011 թվականի հունվար-փետրվար ամիսների ընթացքում բանակում կորուստների թիվը հասել է 22-ի:
Նա նշել է, թե զոհերից 20-ը ծառայություն են անցել Ադրբեջանի պաշտպանության նախարարության զորամասերում, մեկը սահմանապահ զորքերում, իսկ մյուսը՝ ներքին զորքերում:
Փորձագետը նշել է, որ պաշտոնական տվյալներով, 2010 թվականին ադրբեջանական բանակն ունեցել է 71 զոհ, որից 17-ը` մարտական դիրքերում: Սակայն ոչ պաշտոնական տվյալներով ադրբեջանական բանակում գրանցված զոհերի թիվը շատ ավելին է:
Սումերենլիին նշել է, թե երբ ուշադիր հետևում ես վիճակագրությանը, պարզ է դառնում, որ կորուստների մեջ գերակշիռ թիվ են կազմում ոչ կանոնադրական հարաբերությոնների արդյունքում գրանցված զոհերը: Նա տեղեկացրել է, որ 2003-2010 թվականների ընթացքում ադրբեջանական բանակում գրանցվել է 465 զոհ:
Փորձագետն ընդգծել է, որ ընդհանուր առմամբ 2007-2010 թվականներին բանակում նկատվել է «դեդովշինայի» և ինքնասպանությունների փաստերի աճման միտում:
/Aysor.am/
|