Վարչապետ Տիգրան Սարգսյանն այսօր երեխաների պաշտպանության օրվա առթիվ արդարադատության նախարար Հրայր Թովմասյանի ուղեկցությամբ այցելել է «Աբովյան» քրեակատարողական հիմնարկ, որտեղ գտնվում են 17 անչափահաս դատապարտյալներ: Կառավարության ղեկավարը շրջել է քրեակատորաղական հիմնարկով, անչափահաս դատապարտյալների, նրանց ծնողների և հարազատների հետ մասնակցել ճաշկերույթի: Տիգրան Սարգսյանը ծանոթացել է այստեղ իրենց պատիժը կրող անչափահասների խնդիրներին: Վարչապետը հորդորել է լինել մեր երկրի օրինապահ քաղաքացիներ, և պատժի կրելուց հետո հանցանք չգործել: Այս մասին հայտնեցին կառավարության տեղեկատվության ու հասարակայնության հետ կապերի վարչությունից:
Ավելի վաղ հիմնարկում կազմակերպվել էր «Իմ երազանքը», «Իմ ապագան» խորագրով շարադրության մրցույթ, որին մասնակցել էր 8 դատապարտյալ: Լավագույններին Տիգրան Սարգսյանն անձամբ հանձնեց պատվոգրեր և նվերներ` շախմատներ, ֆուտբոլի և բասկետբոլի գնդակներ, իսկ «Աբովյան» ՔԿՀ-ին նվիրել է համակարգիչ:
Պատասխանելով վարչապետի հարցերին` անչափահաս դատապարտյալները հավաստիացրել են, որ քրեակատարողական հիմնարկում ստեղծված են կենցաղային անհրաժեշտ պայմանները:
Քրեակատարողական հիմնարկում գործում է արհեստագործական ուսումնարան, որի ղեկավար Թեմիկ Խալաթյանն ՀՀ վարչապետին ներկայացրել է դատապարտյալների ձեռքի աշխատանքները, որոնք մասնակցել են միջազգային ցուցահանդեսների: Լրագրողների հետ զրույցում Տիգրան Սարգսյանը նշել է, որ կան պատիժը կրող երեխաներ, որոնք մեկուսացված են հասարակությունից. «Կարևոր է նրանց համար ստեղծել համապատասխան միջավայր, որպեսզի վերջիններս ապրեն լիաժեք` գիտակցելով կատարված մեղքը, նաև կրթվեն և դաստիարակվեն»: Կառավարության ղեկավարի համոզմամբ` ոլորտում առկա խնդիրների լուծման համար պահանջվում են բարեփոխումներ.«Քրեակատարողական հիմնարկի շինությունների ֆիզիկական մաշվածության աստիճանը բարձր է և այստեղ մեծածավալ ներդրումներ են պահանջվում»:
Վարչապետի խոսքով, քրեակատարողական հիմնարկում անչափահաս դատապարտյալների թվում կան տաղանդաշատ երեխաներ, որոնք հետագայում կարող են իրենց արժանի տեղը գտնել և լավագույն կերպով դրսևորվել հասարակությունում` արվեստի, գիտության սպորտի ոլորտներում:
/Panorama.am/
| 
