«Քարնեգի» հիմնադրամի ավագ վերլուծաբան Թոմաս դը Վաալը, «National Interest» պարբերականում անդրադառնալով G8-ի (մեծ ութնյակ) համաժողովից հետո Լեռնային Ղարաբաղի հակամարտության վերաբերյալ Ռուսաստանի, Ֆրանսիայի և ԱՄՆ-ի նախագահների համատեղհայտարարությանը, այն անվանել է հակամարտության վերաբերյալ վերջին տարիներին արված ամենակարևոր միջազգային հայտարարություններից մեկը:
Ըստ Թոմաս դը Վաալի` մայիսի 26-ին երեք միջնորդ երկրների ղեկավարների կողմից արված հայտարարությունից պարզ դարձավ, որ մոտենում է ճշմարտության պահը: «Հունիսի վերջին Ռուսաստանի Կազան քաղաքում նախագահ Դմիտրի Մեդվեդևը, Ֆրանսիայի և ԱՄՆ-ի միջնորդների աջակցությամբ, վճռական քայլ է կատարելու` նախագահներ Ալիևի և Սարգսյանի կողմից արդեն հինգ տարի քննարկվող Հիմնարար սկզբունքների մասին փաստաթղթի ընդունման ուղղությամբ»,-գրում է դը Վաալը: Վերլուծաբանի կարծիքով` ԼՂ հակամարտությանը Կոսովոյի համեմատ շատ ավելի քիչ են ուշադրություն դարձնում, սակայն այն ընթանում է չափազանց զգայուն տարածաշրջանում.
«Եթե կողմերից մեկը որոշի վերսկսել ռազմական գործողությունները, իսկ այդ կողմը կլինի 1991-1994 թթ. հակամարտությունում պարտված Ադրբեջանը, ապա դա աղետալի հետևանքների կբերի»: Դը Վաալը շեշտում է, որ հատկապես կոպիտ է ադրբեջանական կողմի հռետորականությունը:
Նշելով, որ ԼՂ հակամարտության շուրջ խաղաղության հաստատման գործընթացը կախված է Հայաստանի և Ադրբեջանի նախագահների քաղաքական կամքից` վերլուծաբանը, սակայն, շեշտել է որ օտարերկրյա տերությունների կողմից նույնպես պետք է լուրջ մոտեցում ցուցաբերվի, և եթե խաղաղություն հաստատելուն ուղղված ջանքերը հավանության չեն արժանանում պետությունների ներսում, ապա միջազգային հանրությունը պետք է սատարի նախագահների վճռականությունը: Եզրափակելով դը Վաալը նշել է, որ Կազանի հանդիպումը ցույց կտա թե արդյոք Կովկասում ավելացել է պատերազմի ծավալման, թե խաղաղության հաստատման հավանականությունը:
/Panorama.am/
| 
