ԱՄՆ պետքարտուղար Հիլարի Քլինթոնի այցը տարածաշրջան որևէ սկզբունքային փոփոխություն չբերեց հայ-թուրքական հարաբերություններում, սակայն որոշակի շեշտադրումներ փոխեց թուրք-ամերիկյան հարաբերություններում, գտնում է Հայաստանի ԳԱԱ Արևելագիտության ինստիտուտի տնօրեն, թուրքագետ Ռուբեն Սաֆրաստյանը:
Այսօր ասուլիսի ժամանակ փորձագետը կարծիք հայտնեց, որ եթե անգամ Ցեղասպանության զոհերի Ծիծեռնակաբերդի հուշահամալիր կատարած պետքարտուղարի այցը Հայաստանում ԱՄՆ-ի դեսպանատունը որակեց իբրև մասնավոր, այդուհանդերձ այն հայտնի պատճառներով չի կարող ամբողջությամբ գոհացնել հայկական կողմին, քանի որ հիմնականում բխում է թուրք-ամերիկյան հարաբերությունների տրամադրություններից:
«Քլինթոնի այցը մեսիջ էր Թուրքիային: Ամերիկացիները ևս մեկ անգամ սպառնացին, որ հնարավոր է ԱՄՆ-ն ճանաչի Ցեղասպանությունը, եթե չլինեն զիջումներ ինչ-ինչ պայմաններում»,- ասաց նա:
Ըստ բանախոսի, դրան էր միտված նաև Քլինթոնի հայտարարությունը, թե հայ-թուրքական հարաբերությունների կարգավորման գործընթացի շրջանակներոմ «գնդակը Թուրքիայի դաշտում է», ինչով Վաշինգտոնը ևս մեկ անգամ հաստատեց գործընթացին իր հավատարիմ լինելը:
«Սա ցույց տվեց նաև, որ ԱՄՆ-ն գոհացած է Հայաստանի դիրքորոշմամբ և սպասում է, որ Թուրքիան որոշակի քայլեր կձեռնարկի», - նշեց Ռ.Սաֆրաստյանն ու ավելացրեց, որ այս երկու հանգամանքները թույլ են տալիս պետքարտուղարի այցը գնահատել իբրև Անկարայի վրա ճնշում գործադրելու հերթական փորձ:
Բանախոսն անդրադարձավ նաև Ծիծեռնակաբերդ կատարած այցին հետևած Թուրքիայի ԱԳ նախարար Ահմեդ Դավութօղլուի արձագանքին: Հիշեցնենք, որ Թուրքիայի արտգործնախարարը բողոք էր հայտնել Հ.Քլինթոնի` Ծիծեռնակաբերդ կատարած այցի կապակցությամբ ու նշել, որ այցը հարուցել է նրանց դժգոհությունը, թեպետ և պետքարտուղարը որևէ ելույթով հանդես չի եկել:
Ըստ փորձագետի` այս հայտարարությունը ցույց տվեց, որ Թուրքիան համառում է և չի պատրաստվում կտրուկ քայլեր ձեռնարկել հայ-թուրքական հարաբերությունների կարգավորման ուղղությամբ`շարունակելով Ցեղասպանության ժխտման քաղաքականությունը:
«Թուրքիան հույս ունի ամերիկացիների հետ լեզու գտնել ու հերթական անգամ խուսափել ԱՄՆ-ի կողմից Ցեղասպանության ճանաչման այդ փաստից», - մեկնաբանեց Ռուբեն Սաֆրաստյանը:
/Aysor.am/
|
