Միջազգային հանրությունը հաճախ խոսում է այն մասին, որ ներքաղաքական անկայուն վիճակն է Հայաստանին և Ադրբեջանին ետ պահում ԼՂ հարցում առավել որոշիչ քայլեր իրականացնելուց: Այն, որ Իլհամ Ալիևը կարողացել է առժամանակ գլուխ հանել ներքաղաքական խնդիրներից, իսկ Հայաստանում էլ սկսվել է քաղաքական երկխոսություն, դեռ չի նշանակում, թե ամեն ինչ կայուն է և կարելի է գնալ որոշիչ քայլերի: Հարավային Կովկասում իրավիճակը բավական դինամիկ է փոխվում, ինչպես նաև մեծ է արտաքին գործոնի ազդեցությունը,- ասել է ռուս քաղաքական վերլուծաբան Ալեքսեյ Վլասովը «Առաջին լրատվականի» հետ զրույցում: «Այստեղ պետք է հաշվի առնել, թե ի՞նչ հնարավորություն կա Հարավային Կովկասի ներքաղաքական այդ կայունությունը հաստատուն դարձնելու, և արդյո՞ք Արևմտյան խաղացողները ցանկություն չեն ունենա արհեստականորեն լարվածության կետեր ստեղծել կասպիական շրջանում կամ էլ Հայաստանում, որպեսզի պահպանվի ռուսական ազդեցությունը»,- մանրամասնել է Վլասովը: Նրա խոսքով, հաշվի առնելով արտաքին մեծ ազդեցությունը հարավկովկասյան երկրների ներքաղաքական գործընթացների վրա՝ այժմ շատ դժվար է կանխատեսել, որ ԼՂ հարցում հնարավոր կլինի առաջընթաց գրանցել. «Դա շատ լավատեսական կլիներ, սակայն կարծում եմ, որ շատ բան կիմանանք այս տարվա աշնանը, որը բավական որոշիչ կլինի»,- ասել է վերլուծաբանը:
/Times.am/
|
