Վերջին տարիներին բազմաթիվ ադրբեջանցիներ լքել են իրենց երկիրն ու բնակություն հաստատել եվրոպական տարբեր երկրներում: Նրանց մեջ կան Ադրբեջանում բավական հայտնի մարդիկ՝ գիտնականներ, արվեստագատներ, մշտական բնույթ կրող քաղաքական հետապնդումներից խուսափող փախստականներ: Ինչպես հաղորդում է «pia.az» լրատվական կայքը, արտագաղթած ադրբեջանցիների մի հատված Եվրոպայում ապրում է հայերի անվան տակ: Միայն Ֆրանսիայում, ըստ կայքի, մոտ 100 այդպիսի ադրբեջանական ընտանիք կա:
Մասնավորապես, արտերկրում ապրող մի ադրբեջանցի նշել է, որ Հադիյյե անունով մի կին զբաղվում է ադրբեջանցիներին Ֆրանսիա տեղափոխելով: Նա զգալի գումարի դիմաց կեղծ հայկական ծննդյան վկայականներ է տալիս այդ մարդկանց, որոնք էլ դրանք ներկայացնում են Ֆրանսիայի ոստիկանական մարմիններին:
Ընդ որում Հադիյյեի «հաճախորդների» շարքերում բավական հայտնի մարդկանց հարազատներ կան: Նշվում է հայտնի ջութակահար Քամիլի եղբոր և «Capital Bank»-ի Շեքիի մասնաճյուղի գլխավոր հաշվապահ Մամադ Սադրեդինովի աղջկա՝ Նիգարի անունները: Ի դեպ, կայքի տեղեկություններով, Նիգարն ապրում է Ֆրանսիայում Նելլի Բաբայան անվան տակ: Ըստ «pia.az»-ին հասած որոշ տեղեկությունների՝ շատ ադրբեջանցի պաշտոնյաների հարազատներ նույնպես կեղծ հայկական ինքնությամբ հաստատվում են Եվրոպայում:
/Panorama.am/
| 
