Փոխվարչապետ, տարածքային կառավարման նախարար Արմեն Գևորգյանն այսօր ընդունել է ԱՄՆ-ի ժողովրդավարության, մարդու իրավունքների և աշխատանքի հարցերով պետքարտուղարի փոխտեղակալ Թոմաս Մելիայի գլխավորած պատվիրակությանը, տեղեկացնում է նախարարության հասարակայնության հետ կապերի բաժինը: Պետքարտուղարի փոխտեղակալը, ում հիմնական գործառույթներից է ԱՄՆ պետքարտուղարության մարդու իրավունքների զեկույցի պատրաստման աշխատանքների վերահսկումը, մասնավորապես առանձնացրել է ՀՀ փոխվարչապետի ղեկավարած թրաֆիքինգի հարցերով խորհրդի աշխատանքը` նշելով, որ ոլորտում նկատելի տեղաշարժ է արձանագրվել, և պետքարտուղարության զեկույցում Հայաստանի դիրքերը բարելավվել են: «Այս ուղղությամբ աշխատանքները բարձր ենք գնահատում: Ցանկանում ենք շարունակել ոլորտում աշխատանքներն ու համագործակցությունը, որպեսզի Հայաստանն ավելի բարձր տեղ զբաղեցնի»,- նշել է հյուրը: Ա. Գևորգյանն իր հերթին շնորհակալություն է հայտնել ԱՄՆ դեսպանատանը և նախկին դեսպան Մարի Յովանովիչին, ում անձնական ջանքերի շնորհիվ նաև հնարավոր եղավ առաջընթաց արձանագրել թրաֆիքինգի դեմ պայքարի հարցում: Նա անդրադարձել է ոլորտում կատարված աշխատանքներին` նկատելով, որ ամենակարևորը վարչարարության խնդրի լուծումը և տարբեր մարմինների միջև համագործակցության կանոնակարգումն էր: Կողմերն անդրադարձան նաև ընտրական շրջանում տարածքային և տեղական ինքնակառավարման մարմինների կողմից օրենսդրական պարտավորությունների պատշաճ իրականացման խնդիրներին: Համոզմունք հայտնվեց, որ գալիք խորհրդարանական ընտրությունների ժամանակ տարածքային և ՏԻ մակարդակում կազմակերպչական առումով խնդիրներ չեն լինի, և ամեն ինչ կիրականացվի պատշաճ մակարդակով: Զրուցակիցները շոշափել են նաև հանրապետությունում կրոնական փոքրամասնությունների իրավունքների պաշտպանությանն առնչվող հարցեր:
/Times.am/
| 
