«Այն, որ այսօր ԼՂ հակամարտության խաղաղ կարգավորման բանակցություններն ընթանում են առանց արցախյան կողմի ուղղակիորեն մասնակցության, չի նշանակում, որ Արցախը բանակցային կողմ չէ, թեկուզ և միայն այն պատճառով, որ ԵԱՀԿ Մինսկի խմբի համանախագահները տարածաշրջան այցելելիս պարտադիր մեկնում են նաև Արցախ, որտեղ նույնպես, ըստ էության, շարունակում են բանակցությունները», պատասխանելով Times.am-ի թղթակցի հարցին, թե ինչպես է պատկերացնում Արցախյան կողմի` բանակցություններին մասնակցության հնարավորությունը, նշեց Արցախի հարցով փորձագետ, կոնֆլիկտաբան Ալվինա Աղաբաբյանը: Ըստ փորձագետի, բանակցային գործընթացին արցախյան կողմի ուղղակիորեն մասնակցության վերականգնման հարցը մշտապես բարձրացվել է տարբեր մակարդակներով թե´ Հայաստանում և թե´ Արցախում:
«Կարծում եմ` առանց արցախյան կողմի ուղղակիորեն մասնակցության հնարավոր չէ որևէ էական առաջընթաց արձանագրել բանակցությունների ընթացքում: Ներկայիս բանակցային ոչ լիարժեք, խեղված ձևաչափը դժվար թե կկարողանա բերել ղարաբաղա-ադրբեջանական հակամարտության վերջնական լուծմանը: Կարծում եմ` բանակցությունների եռակողմ ձևաչափի վերականգնումն անհրաժեշտ է և միանգամայն հնարավոր, պարզապես ժամանակի խնդիր է»:
Խոսելով Արցախյան կողմի` բանակցային գործընթաց վերադառնալու հավանականության մասին, մեր զրուցակիցն առանձնացրեց այն փաստը, որ Ադրբեջանն այսօր չի ցանկանում դեռ առ դեմ բանակցել Արցախյան իշխանությունների հետ, քանի որ այդ կերպ ստացվում է, որ նա թեկուզ անուղղակիորեն, բայց ընդունում է Արցախի` իրենից անջատ, անկախ լինելու հանգամանքը:
«Սա, իհարկե, Ադրբեջանի համար որոշակիորեն նաև հոգեբանական խնդիր է, որը Ադրբեջանը, կարծես, չի շտապում հաղթահարել և շարունակում է պարբերաբար ռազատենչ հայտարարություններ հնչեցնել, սադրանքներ կազմակերպել սահմանային գոտում և այլն: Սակայն Ադրբեջանը վաղ թե ուշ ստիպված է լինելու արցախյան կողմի հետ կրկին նստել բանակցային սեղանի շուրջ. այլ տարբերակ թերևս դժվար է պատկերացնել», ամփոփեց փորձագետը:
/Times.am/
|
