«Վերջին օրերին ադրբեջանական լրատվամիջոցները կրկին հեղեղված են ղարաբաղյան հիմնախնդիրը պատերազմական ճանապարհով լուծելու անհրաժեշտության մասին տարբեր գրչակների, տարբեր մակարդակի «փորձագետների», մեջլիսականների ելույթներով: Եվ, ինչպես միշտ, հնչում են արդեն սովորական սպառնալիքներ, գովազդվում է հսկայական ծավալներով գնվող արդիական սպառազինությունը, գովերգվում է ադրբեջանական բանակի «հաղթական» ոգին»,- Panorama.am-ի հետ զրույցում ասաց ռազմական փորձագետ Հենրիկ Երիցյանը:
Նա նշեց, թե բնական է, որ հերթական անգամ աչքի ընկնելու հարմար առիթը բաց չի թողել նաև ադրբեջանական ամենամարտունակ բանակի խոսնակը` հայտնի Էլդար Սաբիրօղլուն:
«Մեկուկես տասնամյակ շարունակ ամբողջ աշխարհը փորձեր է ձեռնարկում խաղաղ ճանապարհով ղարաբաղյան հակամարտության կարգավորման ուղղությամբ։ Միջազգային տարբեր ատյաններից կոչեր են հնչում խնդիրը բանակցային ճանապարհով լուծելու անհրաժեշտության մասին, ջանքեր են գործադրվում պատերազմական գործողությունների վերսկսման բացառման ուղղությամբ: Այսօր էլ ամբողջ աշխարհը, արձագանքելով ԵԱՀԿ ՄԽ համանախագահող երկրների Դովիլյան հայտարարությանը, որտեղ հստակ արձանագրվում է, որ եթե կողմերից որևէ մեկը գնա պատերազմական գործողությունների, ապա միջազգային հանրությունը կդատապարատի այդ քայլը, սպասում է դրական տեղաշարժերի բանակցային գործընթացում, հուսալով, որ հունիսի վերջին Կազանում կայանալիք հանդիպումը գոնե կստիպի Ադրբեջանին զերծ մնալ ռազմատենչ նկրտումներից: Միայն Ադրբեջանն է, որ իր ժողովրդին էլի ու էլի նախապատրաստում է ոչ թե խաղաղության, այլ պատերազմի: Ի՞նչ է ասում Սաբիրօղլուն: Նրա մատուցմամբ` Հայաստանի ղեկավարությունը պարբերաբար հիմնախնդրի կարգավորման խաղաղ բանակցությունների խոչընդոտներ է ստեղծում, ինչը անխուսափելի է դարձնում խնդրի ռազմական լուծումը: Խոչընդոտներն էլ, նրա խոսքերով, հայկական կողմից հրադադարի ամենօրյա խախտումներն են, խաղաղ բնակչության գնդակոծումները, և այլն, և այլն... Եվս մեկ անգամ հայտարարելով, թե իր երկրի բանակը մարտունակությամբ մի քանի անգամ գերազանցում է հայկականին, նա հոխորտում է, որ «ադրբեջանական զինվորը կարդարացնի ժողովրդի, երկրի ղեկավարության, գերագույն հրամանատարի հույսերը և կազատագրի «օկուպացված հողերը թշնամուց»: Այս զավեշտալի հայտարարությանն արդեն արձագանքել են Հայաստանի պատկան մարմինները: Ամեն ինչ պարզ է ու հասկանալի: Ադրբեջանում քաոսային իրավիճակ է տիրում, և այդ երկրի ղեկավարությունը վայրկյանը բաց չի թողնում սեփական ժողովրդի ուշադրությունը ներքին խնդիրներից շեղելու համար` բնականաբար, քննադատելով հայկական բանակը: Ադրբեջանական քարոզչամեքենան ամեն ինչ ներկայացնում է իրենց օգտին: Միշտ էլ հեշտ է մեղքը բարդել հակառակորդ կողմի վրա, և չհաշվել սեփական խախտումների քանակը: Բոլորովին վերջերս էլ, մեկնաբանելով դիպուկահարներին շփման գծից հեռացնելու վերաբերյալ միջնորդների առաջարկը` նույն Սաբիօղլին հայտարարում էր, որ դա ելք չէ իրադրությունից»,- ասաց փորձագետը:
Այնուհետև Հ. Երիցյանը հավելեց. «Իսկ որ՞ն է ելքը, պատերա՞զմը: Իսկ իրո՞ք պատրաստ է պատերազմի ադրբեջանական «հաղթական բանակը»: Սաբիրօղլիներին արդեն չի հաջողվում թաքցնել «հաղթական բանակի» իրական պատկերը, զինծառայողների միջև գրանցվող արտակարգ միջադեպերը, կաշառակերությունը, ամենաթողությունը, ինքնասպանությունների փաստերը...: Բնականաբար, նման բանակով, կաշառակեր զինվորական կոմիսարներով, հիվանդ և սոված զինվորներով Ադրբեջանը ոչ մի պատերազմ էլ չի կարող սկսել, իսկ փուչ ու սուտ հայտարարությունները ընդամենը Ադրբեջանի բնակչությանը գոտեպնդելու համար են: Ի՞նչ հզորության մասին է հոխորտում Սաբիրօղլին, երբ Ադրբեջանի պաշտպանության նախարարությանը դատի են տալիս անգամ հացաթխման ձեռնարկությանը չվճարած գումարի համար/ http://ru.apa.az/news.php?id=184699, http://ru.apa.az/news.php?id=192307/: Ի՞նչ մարտունակության մասին է խոսում Սաբիրօղլին, երբ միայն վերջին շրջանում կաշառակերության համար ձերբակալվել են երեք զինվորական կոմիսարներ` Բաքվի Բինագադինի, Սուրախանի շրջանների և Սումգայիթի զինկոմները, կաշառակերության փաստեր են արձանագրվել Ջալիլաբադի զինկոմիսարիատում, արձանագրվել են նաև ինքնասպանություններ, ոչ կանոնադրական հարաբերությունների հետևանքով սպանվել կամ վիրավորվել են բազմաթիվ զինծառայողներ:
Ի՞նչ պատերազմի մասին է հոխորտում Ադրբեջանը, երբ Սաբիրօղլին հայտարարում է, թե «կարգազանցների և օրինախախտների պատիժը կբարձրացնի ադրբեջանական բանակի վարկը...», իսկ բանակի մարտունակության, մարտական ոգու բարձրացման միակ թերևս արդյունավետ ճանապարհը այդ երկրի «ռազմական փորձագետները» համարում են Բաքվում կայանալիք զինվորական շքերթը...»,- ընդգծեց ռազմական փորձագետը:
/Panorama.am/
|
