Հունիսի 20-ին «Գազպրոմ»-ի գլխավոր գրասենյակում այդ ընկերության նախագահ Ալեքսեյ Միլլերը հանդիպել է Ադրբեջանի պետական նավթային ընկերության (SOCAR) ղեկավար Ռովնագ Աբդուլլաևի հետ: Ռուսաստանյան հոլդինգի մամուլի ծառայության տեղեկատվության համաձայն` կողմերը քննարկել են էներգետիկայի բնագավառում երկկողմանի համագործակցության հարցը: Հանդիպման ժամանակ բարձր է գնահատվել Ադրբեջանից Ռուսաստան գազի մթերման գործում «Գազպրոմ»-ի հետ «SOCAR»-ի միջև համագործակցությունը: Նշվել է, որ այդ ընկերությունների համատեղ գործունեության զարգացումը երկու երկրների երկարաժամկետ համագործակցության ռազմավարական կարևոր ուղղություններից է:
«Pia.az»-ը հետաքրքիր է համարում այն փաստը, որ «SOCAR»-ի պաշտոնական կայքում այդ մասին տեղեկություն չկա: «Կասկած չկա, որ Ադրբեջանի պետական նավթային ընկերության ղեկավարը Մոսկվա է գնացել ոչ հյուսիսային ուղղությամբ գազի փոխադրման հարցը քննարկելու համար: Ամենայն հավանականությամբ, Մոսկվան խորհրդակցում է 2017 թ-ի երկրորդ կիսամյակում արդյունահանվելիք ադրբեջանական մեծ գազի արտահանման շուրջ կամ էլ «Գազպրոմ»-ի հետ համագործակցության վերաբերյալ նոր առաջարկություններ ունի»,- գրում է կայքը:
«Pia.az»-ը հիշեցնում է, որ Ադրբեջանն ու Ռուսաստանը գազի բնագավառում համագործակցությունը սկսել են 2000 թ-ի հոկտեմբերից: Այն ժամանակ «SOCAR»-ը գազ էր ներկրում իր կարիքների համար և մինչև 2007 թ-ը Ռուսաստանից տարեկան 4 մլրդ խոր.մ գազ է գնել: 2007 թ-ին, երբ շահագործման հանձնվեց «Շահդենիզ» հանքավայրը, Ադրբեջանը դադարեցրեց Ռուսաստանից գազի ներկրումը և պատմության մեջ առաջին անգամ սկսեց գազ արտահանել, նախ` Վրաստան և Թուրքիա, իսկ 2010 թ-ի հունվարի 1-ից էլ` Ռուսաստան: 2010 թ-ին «Գազպրոմ»-ը Ադրբեջանից 800 մլն խոր.մ գազ է գնել և այս տարվա համար էլ 2 մլրդ խոր.մ գազ ներկրելու պայմանագիր ունի:
Կայքը հայտնում է, որ պաշտոնական Բաքուն հետաքրքրված չէ` «SOCAR»-ի նախագահի կողմից Մոսկվայում անցկացված բանակցությունների տարածման մեջ: Այս մասին կայքին տեղեկացրած հավաստի աղբյուրը հայտնել է, որ վերջիվերջո բոլորին հայտնի կդառնան արդյունքները, և դեմ հանդիման կկանգնեն Ադրբեջանի իշխանությունն ու Արևմուտքը, քանի որ «NABUCCO»ի հետ կապված` Արևմուտքը տեղեկություն է սպասում Ադրբեջանից, և Ռուսաստանի հետ համաձայնություն լինելու դեպքում այդ նախագիծը վտանգվելու է:
Այս մասին կայքին հիշեցնող աղբյուրը պնդում է, որ Արևմուտքը նույնիսկ կարող է Ադրբեջանի իշխանության փոփոխությանն աշխուժություն հաղորդող իրադարձություններ սկսել իրագործել:
«Ինչպես Բաքու-Թբիլիսի-Ջեյհան նավթային նախագիծը պատճառ դարձավ Էլչիբեյի տապալմանը, «NABUCCO»-ն էլ կարող է վերջ դնել Ադրբեջանի այսօրվա իշխանությանը»,- գրել է կայքը:
/Panorama.am/
| 
