Ինչպես փոխանցում են Panorama.am-ի աղբյուրները Ստրասբուրգից, նախքան նախագահ Սերժ Սարգսյանի ԵԽԽՎ ամբիոնից ելույթ ունենալը, երբ հայաստանյան պատվիրակության ու ԶԼՄ ներկայացուցիչները, ինչպես նաև այլ պատվիրակներ միջանցքում դիմավորում էին ՀՀ նախագահին, արձանագրվել է բավականին հետաքրքիր միջադեպ:
Հայկական պատվիրակության անդամ Նաիրա Զոհրաբյանը բոլորի ներկայությամբ դիմել է ԵԽԽՎ թուրքազգի նախագահ Մևլութ Չավուշօղլուին ու հետաքրքրվել, թե ի՞նչ իրավունքով է վերջինը հետևողականորեն արդեն երկու օր զրկում ՀՀ ներկայացուցչին հարց տալու իր իրավունքից: Պատգամավորը բարձրաձայնել է, թե երբ հերթը հասնում է իրեն, Չավուշօղլին անմիջապես հայտարարում է, որ ինքը փակված է համարում հարց հնչեցողների ցուցակը և, մասնավորապես, դրա հետևանքով Ն.Զոհրաբյանը զրկվել է Ուկրաինայի նախագահին հարց ուղղելու իր հնարավորությունից, թեպետ նախագահ Յանուկովիչի ելույթից հետո, մինչև նիստի ավարտը դեռ մնացած է եղել մոտ 8-9 րոպե ժամանակ: Նույնը նաև Ուկրաինայի արտգործնախարարի դեպքում` Մ.Չավուշօղլին հարցը չի թույլատրել հնչեցնել, հայտարարելով, թե նիստը փակված է:
Ի պատասխան այս մեղադրանքի, ԵԽԽՎ նախագահը հայտարարել է. «Որովհետև ես ձեզ շատ ես սիրում, դրա համար էլ ահա այդպիսի հատուկ ընդգծված վերաբերմունք ունեմ ձեր հանդեպ»: Սակայն այսքանով այս կեսկատակ-կեսլուրջ հրապարակավ երկխոսությունը չի ավարտվում: Նախագահ Սերժ Սարգսյանի մոտենալուն պես, ԵԽԽՎ նախագահը, մատնացույց անելով Ն.Զոհրաբյանին, դիմում է Հայաստանի նախագահին. «Ահա ձեր պատվիրակության իմ ամենասիրելի պատգամավորը»:
Ի դեպ, նույն աղբյուրի համաձայն, Ն.Զոհրաբյանը պատրաստվում է դիմել ԵԽԽՎ Կանոնակարգի և անձեռնմխելիության հանձնաժողովին, որպեսզի վերանայվի վեհաժողովի կանոնակարգի հայտնի G8 կետը: Հիշեցնենք, հենց այս կետով է սահմանվում, որ վեհաժողովում հյուր-հրավիրյալների դեպքում ԵԽԽՎ նախագահն ինքնակամ է որոշում հերթագրվածների հերթականությունը և ո՞ւմ տալ ձայն, իսկ ում` ոչ սկզբունքը:
/Panorama.am/
|