«ԱՄՆ-ի, Ռուսաստանի ու Ֆրանսիայի ճնշման տակ, հնարավոր է, կողմերը գան որևէ լուծման»,- լրագրողների հետ հանդիպման ժամանակ` խոսելով Լեռնային Ղարաբաղի հիմնախնդրի կարգավորման մասին, նշեց Ազգային Ինքնորոշում Միավորման(ԱԻՄ) նախագահ Պարույր Հայրիկյանը:
«Ղարաբաղյան հարցի փակումը մեզ համար կլինի փրկարար»,- ընդգծեց Պ. Հայրիկյանը և հավելեց, որ ինքը պարտվողական դիրքերից հանդես չի գալիս, բայց կարծում է, որ խնդրի շուտափույթ լուծումը բխում է հայկական շահերից:
ԱԻՄ առաջնորդի խոսքերով, այսօր դանդաղ քայլերով դառնում ենք պարտվող կողմ: «Պետք է կանխել նմանատիպ զարգացումները»,- նշեց Պ. Հայրիկյանը: Վերջինիս կարծիքով, խնդրի կարգավորման նպատակով ճիշտ կլինի գնալ միավորման ճանապարհով` ընդօրինակելով երկու Գերմանիաներին:
Հիշեցնենք, որ Լեռնային Ղարաբաղի հակամարտությանը ռազմական փուլը ծագել է 1991թ., երբ ի պատասխան ԼՂ բնակչության ինքնորոշման պահանջի, ադրբեջանական իշխանությունները փորձեցին հարցը լուծել` խորհրդային անվտանգության ուժերի (ԿԳԲ-ի հատուկ ջոկատներ) կողմից անձնագրային ռեժիմի իրականացման քողի տակ էթնիկ զտումներ իրականացնելով եւ լայնածավալ ռազմական գործողություններ սկսելու ճանապարհով, որը բերեց հազարավոր զոհերի եւ զգալի նյութական կորուստների: 1994թ. կնքվեց զինադադար: Ներկայումս հիմնախնդրի կարգավորման շուրջ բանակցությունները ընթանում են ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա) միջնորդությամբ`2007 թ. նոյմբերին վերջիններիս կողմից ներկայացված մադրիդյան առաջարկությունների հիման վրա: Ադրբեջանը մինչ այսօր չի կատարում ՄԱԿ-ի Անվտանգության խորհրդի 1993 թ. 4 բանաձեւերը` շարունակելով տարածաշրջանում սպառազինությունների մրցավազքի հրահրումը եւ կոպտորեն խախտելով միջազգային իրավունքի ուժի եւ ուժի սպառնալիքի չկիրառման սկզբունքը:
/Panorama.am/
| 
