Հունիսի 15-ին «Մոսկվա» կինոթատրոնում ցուցադրվելու է «Ազդ փրոդաքշն»-ի պատրաստած (պրոդյուսեր և ռեժիսոր՝ Հայկ Հարությունյան, սցենարիստ՝ Թեհմինե Հայրումյան) «Իմ Անին» փաստավավերագրական ֆիլմը: Այն ներկայացնում է հայոց երբեմնի շքեղ մայրաքաղաք Անիի պատմությունը: Ֆիլմի իրականացմանը որոշ չափով օժանդակել է Սփյուռքի նախարարությունը. նկարահանումների մեկնարկը համընկել է Անիի 1050-ամյակին նվիրված պետական միջոցառումների ծրագրի ազդարարմանը:
Հայոց հնագույն մայրաքաղաքներից մեկի՝ Անիի մասին ճշմարտությունը ֆիլմում պատմում է Անի անունով աղջիկը: Վավերագրական կինոնկարն ունի նաև խաղարկային մասեր, ներկայացվում է հայ պատմագրության հավաստի և գիտականորեն հիմնավորված փաստերի վրա կազմված մենագրություն: Ֆիլմում եռաչափ անիմացիայի միջոցով Անիի տաճարներն ու եկեղեցիները, ամրոցներն ու պարիսպները, ճարտարապետությունը ներկայանում է իրական` վերականգնված տեսքով:
Պատմական Հայաստանի մասին պատմող գիտահանրամատչելի ֆիլմերի պահանջարկ, ըստ պրոդյուսեր Հայկ Հարությունյանի, Հայաստանում կա, պարզապես հարկավոր է խնդրին մի փոքր ավելի լուրջ մոտենալ. «Ճիշտ կլիներ, որ այսպիսի ֆիլմերը ուսումնական կամ կրթադաստիարակչական պարտադիր պետական ծրագրի մեջ մտնեին, որովհետև հայ երիտասարդն իրավունք չունի չիմանալ` ինչ է Անին, Կիլիկիան, Արևտմյան Հայաստանը, քանի որ դարեր շարունակ մեր մշակույթն այնտեղ է ձևավորվել: Ինչ վերաբերվում է շուկայի թելադրած կանոններին, ապա այդ կանոնները նրանք չեն, որոնցով կարելի է սերիալներ և պատմահայրենասիրական ֆիլմեր արտադրողին նույն շարքին դասել: Պատմահայրենասիրական ֆիլմերի արտադրությունը պետք է ֆինանսավորվի պետության կողմից»:
/Panorama.am/
| 
