«Սա վտանգավոր է, քանի որ Ադրբեջանն ուղղորդվում է ոչ թե ռազմավարական, այլ ` քաղաքական տրամաբանությամբ»,- ասաց նա, նշելով, որ դա է Ադրբեջանի ռազմատենչ հայտարարությունների հիմնական պատճառը:
Բանախոսը նաև նկատեց, որ չնայած Ադրբեջանի նախագահ Ալիևն ահաբեկում է պատերազմի վերսկսմամբ, ռազմական գործողությունների վերսկսումը կարող է այդ երկրում իշխանափոխության պատճառ դառնալ:
«Ադրբեջանում ձևավորվում է Ալիևների պաշտամունք, ոչ թե տեղի է ունենում ռազմական մշակույթի զարգացում: Յուրաքանչյուր ադրբեջանական ղեկավարություն գահընկեց է արվել հենց Ղարաբաղյան հիմնահարցի շրջանակներում իր կողմից գործած քայլերի համար. եթե Ադրբեջանը պատերազմ հայտարարի, ապա կրկին տանուլ կտա: Բացի այդ` ռազմական գործողությունները կազդեն երկրի կենսամակարդակի վրա, քանի որ վտանգի տակ կլինի գազի և նավթի արտահանումը»,- պարզաբանեց Ռ.Կիրակոսյանը:
Փորձագետին մտահոգում է միայն այն հանգամանքը, որ ադրբեջանական ղեկավարությունը, ցանկանալով փոխել տարածքաշրջանային ստատուս-քվոն, կարող է արկածախնդրությունների և սադրանքների գնալ:
«Ադրբեջանը կարող է դիմել այնպիսի սադրանքների, ինչպիսին է, օրինակ հունիսի 18-ի միջադեպը, ու կարող է փորձել այդպիսի «պատահական» միջադեպերով լարում առաջացնել, որից էլ կարող է փոքր բախումից իրավիճակը դուրս գալ վերահսկողությունից և վերաճել լայնածավալ ռազմական գործողությունների»,- ասաց նա, հավելելով, որ Ադրբեջանը դա կարող է անել և սպասելի է, որ ամառային ամիսներին այդպիսի փորձեր կլինեն:
«Հայկական բանակը պետք է պատրաստ լինի այդ «պատահական պատերազմի» հավանականությանը»,- եզրափակեց Ռ.Կիրակոսյանը:
/Aysor.am/
