Կազանում կայանալիք հանդիպման մոտենալուն զուգահեռ Կովկասում աճում են թե խաղաղության, թե պատերազմի խաղադրույքները: Նախօրեին Լեռնային Ղարաբաղի հիմնահարցի շուրջ հերթական հրապարակմամբ նշել է «Քարնեգի» հիմնադրամի ավագ վերլուծաբան Թոմաս դը Վաալը: Նա միևնույն ժամանակ նախազգուշացրել է. «Եթե կողմերից մեկը որոշի վերսկսել ռազմական գործողությունները, իսկ այդ կողմը կլինի 1991-1994թթ.-ի հակամարտությունում պարտված Ադրբեջանը, ապա դա աղետալի հետևանքների կբերի»:
Մինչ այդ, գրեթե նույն նախազգուշացումն արվել էր Մինսկի խմբի համանախագահ երկրների նախագահներ` Օբամայի, Սարկոզիի և Մեդվևդևի Դովիլյան հայտարարության մեջ:
«Ուժի կիրառումը հանգեցրել է այսօր առկա հակադրության ու անկայունության իրավիճակին: Դրա կրկնակի կիրառումը կհանգեցնի միայն նոր տառապանքների ու ավերումների»,- նշել էին գերտերությունների առաջնորդներն ու զգուշացրել, որ դա «կդատապարտվի միջազգային հանրության կողմից»: Ի՞նչ են նշանակում այս նախազգուշացումները և ի՞նչ կարելի է հասականլ «աղետալի հետևանքներ» հասակացության տակ:
«Այս հայտարարությունները հերթական զգուշացումն են Ադրբեջանին, որ զերծ մնա իր ծայրահեղական դիրքորոշումներից և ռազմատենչ հայտարարություններից»,- Panorama.am-ի հետ զրույցում նշեց ռազմական փորձագետ Արծրուն Հովհաննիսյանը:
Նրա խոսքով, Ադրբեջանի այսօրվա «տնտեսությունը փուչիկ է, որտեղ արևմտյան գումարներ են սրսկսված, և եթե այդ գումարների ներդնողները պատերազմի վերսկսման դեպքում կորցնեն իրենց ունեցվածքը, պատասխանատուն կլինի Ադրբեջանը»:
Ա. Հովհաննիսյանը հիշեցրեց, որ այս հորդորները նորություն չեն և նմանատիպ հայտարարություններ նախկինում բազմիցս են արվել, այդ թվում` ԵԱՀԿ Մինսկի խմբի համանախագահների, ՄԱԿ-ի գլխավոր քարտուղարի և այլոց կողմից: «Մի օրինաչափություն կա. երբ Բաքվի հայտարարությունները մի փոքր կոշտանում են, անմիջապես հետևում են Արևմուտքի զգուշացումները»,- ընդգծեց նա:
Փորձագետի խոսքով, ենթակառուցվածքային նախաձեռնություններով հանդես եկող պետությունն իրավունք չունի ռազմատենչ վարքագիծ դրսևորել, քանզի առաջին հերթին վտանգի տակ է դնում հենց այդ ենթակառուցվածքները: «Ադրբեջանի նմանատիպ քայլերը կարող են պայթյունավտանգ իրավիճակ ստեղծել ամբողջ տարածաշրջանում, ինչը չի բխում մեծ տերությունների շահերից»,- ամփոփեց նա:
Ինչ վերաբերում է հավանական պատերազմի հետևանքների բնույթին, ապա քաղաքագետ Սերգեյ Մինասյանի կարծիքով, պատերազմի վերսկսումն արդեն իսկ աղետալի կլինի: «Երկու կողմերից մարդկային զոհերի թիվը կարող է հասնել տասնյակ հազարների, կվնասվեն այն բոլոր ենթակառուցվածքները, որոնք անցնում են հակամարտության շփման գծի մոտով»,- նշեց Ս. Մինասյանը` ընդգծելով, որ կոնֆլիկտային շփման գիծը, դժվար թե, ինչ որ կերպ տարբերվի այսօր առկա իրավիճակից:
«Իլհամ Ալիևը շատ լավ գիտի, որ եթե սկսի պատերազմը ու չհաղթի, իսկ հաղթանակը ադրբեջանական կողմի համար պետք է լինի վերահսկողության հաստատումը ամբողջ ԼՂՀ-ի նկատմամբ, դա կլինի իր քաղաքական վերջը»,- նշեց փորձագետն ու ուշադրություն հրավիրեց այն հանգամանքի վրա, որ եթե պատերազմում Իլհամ Ալիևը պարտվի, ապա Ադրբեջանի ներսում հնարավոր են ամեն տեսակ զարգացումներ, այդ թվում իսլամական ծայրահեղականության աճ:
/Panorama.am/
| 
