«Արցախյան կողմը ոչ թե պասիվ է, այլ առավել կառուցողական, իրատեսական է մոտենում հիմնախնդրին: Այսինքն, մենք չենք առաջնորդվում հիստերիա բարձրացնելու կամ ագրեսիվություն դրսևորելու քաղաքականությամբ: Արցախի նկատմամբ հիստերիկ հայտարարություններ տեղ գտան մի շարք շրջաններում նաև Ռամբուեի հանդիպման ժամանակ, երբ բոլորն ասում էին, թե ամեն ինչ պարզ է, հողերը տրվել են կամ այլ ցնորամիտ բաներ: Բոլոր հանդիպումներից առաջ նույն հիստերիկ հայտարարությունները հնչում է: Գրեթե նույն սցենարը կրկնվում է այսօր»,- մեկնաբանելով հայտարարություններն այն մասին, թե Կազանում կարող է բեկումնային իրադարձություններ արձանագրվել, իսկ Արցախյան կողմն իրեն պասիվ է դրսևորում՝ Panorama.am-ի հետ զրույցում ասաց ԼՂՀ նախագահի աշխատակազմի Հասարակայնության հետ կապերի գլխավոր վարչության պետ Դավիթ Բաբայանը:
Նա անհնար համարեց Կազանում կայանալիք հանդիպման ժամանակ բեկումնային համաձայնության կայացումը կամ պայմանագրի ստորագրումը:
«Նախ Արցախը դեռևս չի մասնակցում գործընթացին, խոսքս միայն Կազանի հանդիպմանը չի վերաբերվում: Տրամաբանական չէ, երբ կողմերից մեկը չի մասնակցում գործընթացին, չի մասնակցել պայմանագրի պատրաստմանը, բայց պարտավորվի պայմանագրի ինչ-որ կետեր իրականացնել: Նման բան կարող է լինել միայն մեկ դեպքում, եթե ինչ-որ պետություն պարտվում է և նրա ճակատագիրը որոշում են հաղթող երկրները, ինչը բնական է: Մեր պարագայում նման բան չկա ու չի կարող լինել»,- շեշտեց Դ. Բաբայանը:
Բանախոսի պնդմամբ՝ որևէ օբյեկտիվ հիմք չկա, որպեսզի ինչ-որ փաստաթուղթ ստորագրվի:
«Նախ կողմերը նույն այդ սկզբուքնների շուրջ ունեն տարբեր մոտեցումներ՝ իրարամերժ: Բանն այն է, որ, ասենք, մեզ համար ընդունելի է տարածքային ամբողջականության սկզբունքը, բայց մենք դա դիտարկում ենք այլ տեսնակյունից: Ադրբեջանը տարածքային ամբողջականություն ասելով նկատի ունի խորհրդային Ադրբեջանի տարածքը, իսկ մեր համար, դա լրիվ այլ հարթություն է, նույնը վերաբերվում է նաև ժողովուրդների ինքնորոշման սկզբունքին: Հետևաբար կարծել, թե կողմերի մինչև մի այնպիսի մթնոլորտ է, որ ամեն ինչ որոշված է, դա այդպես չէ: Ու այս պարագայում, կարծել, թե Կազանում բեկումնային ինչ-որ բան է ստորագրվելու, վաղաժամ է»,- նշեց արցախցի պաշտոնյան:
/Panorama.am/
|