«Լեռնային Ղարաբաղի հակամարտության շփման գծում ռազմական գործողությունների վերսկսումը չի բացառվում, հաշվի առնելով Ադրբեջանում չդադարող ռազմատենչ հայտարարություններն ու հակահայկական քարոզչությունը»,- ասել է ԼՂՀ նախագահ Բակո Սահակյանը` ռուսական «Военный дипломат» պարբերականին տված հարցազրույցում:
Միաժամանակ Բակո Սահակյանը նշել է, թե լայնամասշտաբ գործողությունների հավանականությունը ցածր է:
Պատասխանելով հարցին, թե ինչպիսի±ն է իրավիճակը շփման գծում ու հնարավո±ր է արդյոք ռազմական գործողությունների վերսկսումը, ԼՂՀ Նախագահն ասել է, թե Լեռնային Ղարաբաղի Հանրապետության ու Ադրբեջանի միջև կա բավականին կայուն ռազմա-քաղաքական բալանս, ինչ էլ այսօր, ըստ էության, համարվում է կայունության կարևոր գործոններից` ինչպես ղարբաղա-ադրբեջանական հակամարտության գոտում, այնպես էլ հարավկովկասյան տարածաշրջանում :
«Ինչ վերաբերում է իրավիճակին սահմանային հատվածում, ապա ադրբեջանական կողմը պարբերաբար խախտում է հրադադարի ռեժիմը: Վերջին ժամանակահատվածում այդ խախտումներն հաճախակի են դարձել, սակայն, դրանք չեն կարող փոխել ուժերի գործող բալանսը կամ կոտրել մեր ժողովրդի ու բանակի ոգին: Չնայած պետք է նշել, որ նմանատիպ գործողություններով Ադրբեջանն էլ ավելի է ուժեղացնում անվստահությունն իր հանդեպ` խոչընդոտելով խաղաղ կարգավորման գործընթացը: Մենք պարբերաբար հանդես ենք գալիս վստահության ամրապդմանը միտված տարբեր առաջարկություններով: Օրինակ` առաջարկել ենք շփման գծից հետ քաշել դիպուկահարներին: Ադրբեջանական կողմը սակայն նենգափոխում է մեր յուրաքանչյուր առաջարկություն, որքան էլ, որ այն կառուցողական լինի: Ինչ վերաբերում է ռազմական գործողությունների վերսկսմանը, ապա նմանատիպ զարգացում մենք երբևէ չենք բացառել, հատկապես Ադրբեջանի կողմից չդադարող ռազնմատենչության ու հակահայկական քարոզչության պայմաններում», - ասել է Բակո Սահակյանը:
Արցախի նախագահի խոսքերով, պատերազմը հղի է անկանխատեսելի հետևանքներով, հատկապես Հարավային Կոկասի նման ռազմավարական նշանակության տարածաշրջանում, ինչում շահագրգռված չէ միջազգային հանրությունը, մասնավորապես` ԵԱՀԿ միջնորդները:
«Միևնույն ժամանակ, պետք է նշեմ, որ ԼՂՀ Պաշտպանական բանակը, իրոք, աչքի է ընկնում բարձր մարտունակությամբ, և մեր զինված ուժերն ի զօրու են դիմակայելու Ադրբեջանի կողմից եկող ցանկացած ագրեսիայի: Ամեն դեպքում, ղարբաղա-ադրբեջանական խնդրի կարգավորման ուժային լուծումը անհեռանկարային է, ինչը ակնհայտորեն ցույց տվեց նախորդ պատերազմը: Անհրաժեշտ է բոլոր ջանքերն ուղղել ռազմական գործողությունների չվերսկմանն ու հարցերը քննարկել բանակցային սեղանի շուրջ: Անցնելով պատերազմի միջով, մենք առավել գնահատում ենք խաղաղությունը», - ասել է ԼՂՀ նախագահը:
/Panorama.am/
|
