Голос Армении թերթը ներկայացրել է Ստեփանակերտի ազգային անվտանգության հարցերով փորձագետ, քաղաքագետ Հրաչյա Արզումանյանի մեկնաբանությունները ԵԱՀԿ նախագահի անձնական ներկայացուցիչ Անջեյ Կասպրշիկի` լեհական «Nowa Europa Wschodnia» ամսագրին տված հարցազրույցի վերաբերյալ: Հ. Արզումանյանը նշում է, որ ԼՂ հակամարտության մասին խոսելիս Կասպրշիկն Արցախը դիտարկել է զուտ որպես Հայաստանի և Ադրբեջանի միջև հակամարտության պատճառ դարձած տարածք, որը պետք է ընդունի այն որոշումը, որը կկայացնեն նախագահները:
Քաղաքագետը գրում է, որ Արցախը ինքնուրույն պետական միավոր է, որն ունի ժողովուրդ. «Իրավական ի՞նչ սկզբունքների վրա հենվելով է միջազգային հանրությունը Արցախին խաղաղություն պարտադրելու` առանց ներգրավելու այս երկիրն իր ճակատագրի քննարկման գործընթացի մեջ: Արցախը միայն տարածք չէ, այն քաղաքացիական ժողովրդավարական հասարակություն է»,-նշում է Հ. Արզումանյանը:
Շեշտելով, որ անընդունելի է զիջումների գնալ Իլհամ Ալիևի ագրեսիվ հռետորականությանն ու շանտաժներին` քաղաքագետը հիշեցնում է, որ երբ անցյալ դարի 30-ականներին Լեհաստանը փորձեց զիջել ագրեսորին` կորցրեց իր պետականությունը և ստացավ Կատինի ողբերգությունը: «Միջազգային հանրությունը պետք է ընդունի, որ Արցախում փորձ է արվում շարունակել 20-րդ դարի սկզբին նախաձեռնված Հայոց մեծ եղեռնը, և եթե դա հաջողվի, նախագահներ Օբաման, Մեդվեդևը և Սարկոզին ստիպված կլինեն իրենց վրա վերցնել արդեն 21-րդ դարում արցախահայության բնաջնջման փորձի պատասխանատվությունը»,-նշում է Հ. Արզումանյանը:
/Panorama.am/
|
