Աղմկահարույց Օղուզ-Գաբալ-Բաքու ջրագծի հետ կապված նոր փաստեր են ի հայտ եկել: Պարզվել է, որ Ադրբեջանի բյուջեի վրա 1 մլրդ դոլար արժեցած այդ ջրագծում, որով պետք է Օղուզի և Գաբալայի բնական աղբյուրներից խմելու ջուր հասցվեր Բաքու և որը հանդիսավոր կերպով շահագործման է հանձնվել 2010 թ-ի դեկտեմբերի 28-ին, դեռևս ջուր չկա և Բաքվում ջրի սակավություն է սկսվել:
«Ենի Մուսավաթը» պարզել է, որ Նավթի հիմնադրամի հաշվին կառուցված այդ ջրագծի հանդիսավոր բացման արարողության ժամանակ շինարարները երկրի ղեկավարությանը խաբել և ջրագիծ են բաց թողել ոչ թե Օղուզի և Գաբալայի աղբյուրների ջրերը, ինչպես նախատեսված է նախագծով, այլ Ջեյրանբաթան լճի ջուրը:
Այս տեղեկությունը հաստատել են նաև ջրագծի շինարարությանը մասնակցած աշխատակիցները: Նրանք վրդովված ասել են, որ կարծում էին, թե նախագահին խաբելու համար ջրագծի պատասխանատուները խստորեն կպատժվեն, սակայն, 1 մլրդ դոլար արժեցած և փաստորեն այդ անջուր խողովակաշարի համար մինչ այժմ ոչ ոք չի պատժվել:
Շինարարությունը 2007 թ-ին սկսված և խոշոր կոռուպցիայի աղբյուր հանդիսացող այդ ջրագիծը կառուցվել է նախատեսվածից 2 տարի ուշացումով, սակայն վերջում պարզվել է, որ 2 մ տրամագծով խողովակները լցնելու բավականաչափ ջուր Օղուզում և Գաբալայում չկա: Ջրագծի բացման ժամանակ հայտարարվել է, որ նրա շինարարության վրա 780 մլն մանաթ, կամ մոտ 1 մլրդ դոլար ֆինանսական միջոց է ծախսվել, և հավաստիացվել բնակչությանը, որ այն պետք է ամբողջությամբ լուծի Բաքվի ջրի խնդիրը:
Ջրագծի շահագործումից մի քանի ամիս հետո Նավթագործների իրավունքների պաշտպանության կոմիտեի և անկախ փորձագետների կողմից անցկացված մոնիտորինգի ժամանակ պարզվել է, որ այն իրականում չի աշխատում: Կոմիտեի ղեկավար Միրվարի Գահրամանլին «Ազատություն» ռադիոկայանի ադրբեջանական ծառայությանն ասել է, որ փաստորեն անցյալ տարվա դեկտեմբերին շինարարները խաբել են Ալիևին:
Նա ասել է, որ Օղուզ-Գաբալ-Բաքու ջրագծի բացումը կեղծ է եղել և այն դեռ պատրաստ չէ: Մյուս հետաքրքիր փաստն էլ այն է, որ ջրագծի իրական երկարությունը ուռճացվել է: Այն նախագծով 266 կմ է, իսկ իրականում` 252,4 կմ: Յուրաքանչյուր կմ-ը 3 մլն մանաթ արժեցած այդ ջրագծի չեղած 14 կմ-ի համար 42 մլն մանաթ (50 մլն դոլար) յուրացվել է:
Թերթը նշում է, որ Օղուզ-Գաբալա-Բաքու ջրագծի հիմնական կապալառուն Ադրբեջանի խորհրդարանի խոսնակ Օգթայ Ասադովի հովանավորած «Ազերսու» ընկերությունն է: Օ. Ասադովին հանձնարարված է եղել նաև ջրագծի կառուցման հսկողությունը: Այժմ ջրագծում ջրի բացակայությունը Բաքվում լուրջ աղմուկ բարձրանալու պատճառ է դարձել: Թերթը գրում է, որ ամռան գալով Բաքվում ջրի խիստ սակավություն է սկսվել: Բաքվի մի շարք շրջաններում ջուր այլևս չկա: Բնակիչները խմելու ջուրը գնում են: Կախված հասցեից, 10 տ տարողությամբ մի մեքենա ջուրն արժե 30-50 մանաթ (մոտ 36-60 դոլար):
/Panorama.am/
| 
