Ըստ Նալբանդյանի` Արդբեջանը խախտել է հրադադարի պահպանպան և ամրապնդման վերաբերյալ` ոչ միայն 1994 թ. մայիսի 12-ին Ադրբեջանի, Ղարաբաղի և Հայաստանի միջև հաստատված հրադադարի պայմանները, այլ նաև 1995 թվականի փետրվարի 4-ին հրադադարի ամրապնդման վերաբերյալ նույն եռակողմ ձևաչափով համաձայնությունը, որով Ադրբեջանը պարտավորվել էր խախտումների մասին անմիջապես տեղյակ պահել հայկական կողմերին, միջնորդներին, և ոչ թե սեփական լրատվամիջոցներին` հակահայկական քարոզչությունը սաստկացնելու համար, ձեռնպահ մնալ հակամարտության սրմանը նպաստող հայտարարություններից:
«Բաքուն տասնյակ տարիներ խախտում է այդ պարտավորությունները»,- ԱԳՆ լրատվական ծառայության փոխանցմամբ` ասել է ՀՀ արտաքին քաղաքական գերատեսչության ղեկավարը` միաժամանակ ընդգծելով, որ թե' Հայաստանը, թե' Ղարաբաղը միշտ էլ կողմնակից են եղել հրադադարի ամրապնդման ուղղությամբ քայլերի ձեռնարկմանը:
Նախարար Նալբանդյանի խոսքերով, Ադրբեջանի կողմից այդ պարտավորությունների խախտմանը համարաժեք արձագանքի բացակայությունը միջազգային հանրության կողմից, հանգեցնում է նրան, որ Ադրբեջանը շարունակում է մերժել որևէ առաջարկ այս ուղղությամբ, ինչպես դա արել է 2008-ին Հելսինկիում ԵԱՀԿ արտգործնախարարների խորհրդի ընթացքում համանախագահ երկրների արտգործնախարարների հնչեցված կոչին `քայլեր կատարելու զինադադարը ամրապնդելու համար, դուրս բերելու դիպուկահարներին շփման գծից:
«Տեսնենք` ադրբեջանցիները ինչպես կարձագանքեն Ալմաթիում արված կոչերին, ի՞նչ քայլեր կձեռնարկեն, կփոխե՞ն արդյոք իրենց ապակառուցողական գործելաոճը, որը չի տանում խնդրի կարգավորմանը»,- նկատել է Նալբանդյանը:
Պատասխանելով այն հարցին, թե ի՞նչ «դեկտեմբերյան առաջարկությունների» մասին է շարունակում պնդել ադրբեջանական կողմը, Էդվարդ Նալբանդյանն ասել է.
«Իրականությունն այն է, որ եռանախագահների 2007 թ. նոյեմբերին կողմերին ներկայացրեցին Մադրիդյան փաստաթուղթը և այն` իբրև պաշտոնական առաջարկ, ի պահ հանձնվեց Վիեննայում ԵԱՀԿ քարտուղարությանը»:
Դրանից հետո, ըստ նախարարի, եղել են երկու տասնյակից ավելի աշխատանքային առաջարկներ` Մադրիդյան փաստաթղթի հիման վրա: Երբ Ադրբեջանը հայտարարեց, որ կարող է ընդունել 2009թ. դեկտեմբերյան աշխատանքային առաջարկը` բայց որոշ բացառություններով, պարզվեց, որ բացառություններն ավելի շատ են, քան ընդունված մասը: «Հետո՞, ի՞նչ է նշանակում ընդունել բացառություններով: Դա փաստացի նշանակում է չընդունել»,- նկատել է նախարարը:
Այնուհետև Նալբանդյանը հիշեցրել է, որ 2010-ի հունվարին Սոչիում ՌԴ նախագահի նախաձեռնությամբ և ներկայությամբ կայացած Հայաստանի և Ադրբեջանի նախագահների հանդիպման ժամանակ պայմանավորվածություն ձեռք բերվեց հանձնարարել ԱԳ նախարարներին`շարունակել բանակցությունները Ռուսաստանի Դաշնության ԱԳ նախարարի միջնորդությամբ:
Նախարար Լավրովի միջնորդությունը, նախարարի խոսքով, վայելում էր և վայելում է Միացյալ Նահանգների և Ֆրանսիայի լիակատար աջակցությունը, ինչի վկայությունն է Ալմաթիի հայտարարությունը: 2010 թ. փետրվար-հունիս ամիսներին կայացել են բազմաթիվ շփումներ արտգործնախարարների մակարդակով, քննարկվել են մի շարք աշխատանքային առաջարկներ` մադրիդյան փաստաթղթի հիման վրա: «Այս բանակցությունների արդյունքում մշակվել է Մադրիդյան փաստաթղթի վերջնական տարբերակը, որը ներկայացվել է հունիսի 17-ին Սանկտ-Պետերբուրգում կայացած հանդիպման ժամանակ, և համաձայնություն ձեռք բերվեց շարունակել բանակցությունները հենց այդ տարբերակի հիման վրա»,- վստահեցրել է նախարարն ու շարունակել.
«Այսօր ադրբեջանցիները մի կողմից ասում են, որ շնորհակալ են, գնահատում են Ռուսաստանի ջանքերը, բայց մյուս կողմից հարցականի տակ են դնում սանկտպետերբուրգյան հանդիպման կարևորությունը: Հիշեցնեմ, որ վերջին շրջանում վեց հանդիպում է կայացել Ռուսաստանի բարձր նախաձեռնությամբ: Հարց է առաջանում ինչու էին մասնակցում այդ հանդիպումներին, եթե դրանք իրենց համար կարևորություն չունեն»:
/Aysor.am/
