«Շատ լավ ելույթ էր, հատկապես այն հատվածը, որը վերաբերում էր Լեռնային Ղարաբաղին»,- Panorama.am-ի հետ զրույցում`մեկնաբանելով նախօրեին ԵԽԽՎ-ում նախագահ Սերժ Սարգսյանի ելույթը, նշեց ռուս հայտնի քաղաքագետ Անդրեյ Արեշևը:
Նրա խոսքերով, այդ ելույթը բազում message- ներ էր պարունակում, սակայն ամենակարևորն այն է, որ Կազանում որևէ լուրջ փաստաթուղթ չի ստորագրվի.
«Ամենակարևորը, ինչ շեշտեց նախագահ Սարգսյանն, այն է, որ հայկական կողմի համար գերակա են Լեռնային Ղարաբաղի անվտանգության ու կարգավիճակի հարցերը և, որ կոնկրետ այդ հարցում միակողմանի զիջումները, դժվար թե, հնարավոր են» ,- նշեց նա:
Ի դեպ, համաձայնելով մեր այն դիտարկման հետ, որ շատերը ելույթից հետո կարող են, գուցե, ենթադրել, որ բեկումնային առաջընթաց դժվար թե արձանագրվի նախագահների եռակողմ հանդիպմանը, Ա.Արեշևն ավելացրեց նաև, որ հիմնականում ադրբեջանական կողմից էին հնչում բեկումնային փաստաթղթի սպասելիքները, սակայն հասկանալի է, որ անգամ Ադրբեջանում ոչ բոլորն են այդ կարծիքը կիսում:
Մի խոսքով, ևս մեկ անգամ կրկնեց նա, «որևէ լուրջ բան, դժվար թե, ստորագրվի»: Հիշեցնենք, որ նախագահ Սերժ Սարգսյանն իր ելույթում Լեռնային Ղարաբաղի մասով մասնավորապես հայտարարել էր. «Անկախ նրանից, թե ով ինչպես է պատկերացնում ղարաբաղյան հակամարտության վերջնական կարգավորումը, մի բան հստակ է. Ղարաբաղը եղել է, կա և կմնա Եվրոպայի մաս: Թեկուզ դեռ չճանաչված, բայց, միևնույն է, մաս» :
/Panorama.am/
|
