«Շուրջ կես տարի է մեր պատվիրակությունը ԵԽԽՎ-ում որդեգրել է այսպիսի մի քաղաքականություն, որ Արցախի հարցում պետք է ինչ-որ քայլեր արվեն, թեպետ չեմ կարող ասել, որ բոլոր հարցերում են նախաձեռնողական եղել»,- լրագրողների հետ հանդիպմանն այսօր հայտարարեց «Ժառանգություն» խմբակցության անդամ Զարուհի Փոստանջյանը, ով նոր է վերադարձել Ստրասբուրգից ու ներկայացնում էր իր տեսակետները ԵԽԽՎ ձմեռային նստաշրջանի աշխատանքների վերաբերյալ:
Մասնավորապես, նա շատ կարևորեց վեհաժողովում ԼՂ վերաբերյալ հռչակագրի ընդունումը, որին, պատգամավորի խոսքերով, հայկական պատվիրակության շատ անդամներ բավականին հոռետես էին տրամադրված. «Նրանց կարծիքով, փաստաթուղթը չէր կարող որևէ այլ պատվիրակության ներկայացուցիչների հավանությանն արժանանալ, սակայն արդյունքում հռչակագրի տակ 22 պատվիրակներ ստորագրեցին»,- տեղեկացրեց Զ.Փոստանջյանը:
Բանախոսը, ճիշտ է, ավելացրեց, որ հռչակագիրն ուղղակի հռչակագիր է, բայց, անշուշտ, հնարավոր է, որ ապագայում հիմք հանդիսանա պարտադիր փաստաթղթերի համար: «Մենք ունենք մեր արդարացի հիմնավորումները` Արցախը կազմավորվել է ԽՍՀՄ փլուզման հետևանքով նույն ժամանակ և նույն օրենքներով, ինչ Ադրբեջանն ու Վրաստանը»,-հայտարարեց Զ.Փոստանջյանը:
Բացի այս, հռչակագիրը կարևորվում է նաև իր քարոզչական նշանակությամբ. Հիշեցրեց` այն ստորագրվել է այլ պետությանների 22 ներկայացուցիչների կողմից, իսկ առնվազն 55 պատվիրակ էլ կարդացել է: Նաև` «Հայաստանի հասարակությունը կարող է նման այլ նախաձեռնություններով հանդես գալ` չվախենալով, որ որևէ միջազգային կառույցի դռները փակ կլինեն»:
/Panorama.am/
|
