Վաղը` մայիսի 4-ին, Ֆրանսիայի Սենատը քննարկելու և քվեարկության է դնելու Հայոց ցեղասպանության ժխտումը քրեականացնող օրինագիծը, որը երկրի Ազգային ժողովը վավերացրել էր 2006-ի հոկտեմբերի 12-ին:
Ըստ Ֆրանսիայի Հայ Դատի գրասենյակի տնօրեն Հրաչ Վարժապետյանի` հակառակ Թուրքիայի բացահայտ ճնշումներին` հայ համայնքը միացյալ ուժերով շարունակում է պայքարել Սենատում օրինագծի վավերացման համար` առաջին հերթին հանուն արդարության և մարդկության արժանապատվության:
Հայ Դատի տնօրենի խոսքերով` հայ համայնքի ներկայացուցիչները` որպես Ֆրանսիայի լիիրավ քաղաքացիներ, իրավունք ունեն պահանջներ դնելու իրենց ներկայացուցիչների առջև, մինչդեռ «թուրքական պետական միջամտությունն անընդունելի է և ընկալվում է որպես մի պետության կողմից այլ ինքնիշխան պետության ներքին գործերին միջամտություն» :
«Հայ համայնքի ներկայացուցիչներն անցյալ շաբաթվա վերջին հանդիպել են նախագահ Նիկոլա Սարկոզիի հետ: Ավելի քան մեկուկես ժամ տևած հանդիպմանը մասնակցել են ՀՅԴ ներկայացուցիչ և CCAF-ի համանախագահ Մուրադ Փափազյանը, CCAF-ի համանախագահ Արա Թորանյանը, Շառլ Ազնավուրի ներկայացուցիչ Լևոն Սայանը, ներկա են եղել նաև Պատրիկ Դևեջյանը և Ժան Սարկոզին։
Ֆրանսիայի նախագահը խոստացել է չխոչընդոտել Հայոց ցեղասպանության ժխտումը քրեականացնող օրինագծի վավերացմանը և չկաշկանդել իր համակիր սենատորների գործողությունները, ընդհակառակը` նա մեկ անգամ ևս հստակեցրել է, որ ինքը մերժում է ցեղապաշտությունը` ընդգծելով, որ «ժխտողականությունը հավասարազոր է ցեղապաշտությանը»», - ասված է ՀՅԴ Մամլո դիվանի հաղորդագրությունում։ /Aysor.am/
| 
