Այսօր լրագրողների հետ հանդիպման ժամանակ ՊՆ Հանրային խորհրդի անդամ, ռազմական հոգեբան Դավիթ Ջամալյանը խոսելով մինչզորակոչային տարիքում երիտասարդների ֆիզիկական պատրաստվածության անհրաժեշտության մասին, նշեց, որ մարտունակ և հոգեպես հավասարակշռված զինվոր ունենալու համար ֆիզիկական պատրաստվածությունը շատ կարևոր է: «Որպեսզի զինվորը բանակային կյանքին հարմարվի, դրա համար պետք է, որ զինվորը հոգեբանորեն և ֆիզիկապես պատրաստված գնա բանակ: Եթե զիվորը հոգեբանորեն և ֆիզիկապես պատրաստված է գնում բանակ, ապա բանակում հարմարվելու շրջանը շատ ավելի հեշտությամբ է անցնում»,-հավելեց նա:
Ըստ Դավիթ Ջամալյանի, որպեսզի զիվորը հոգեբանորեն պատրաստված գնա բանակ, այդ հարցում մեծ դեր ունեն նաև ծնողները: «Ընտանիքը պետք է պատրաստի իր զավակին ծառայության: Եթե վաղ դպրոցական տարիքից բանակում ծառայելու անխուսափելիության գաղափարը ծնողները արմատավորում են զավակի մոտ, ապա նման պատանիները շատ հաջողված զինվորներ են լինում, իսկ եթե զինվորն այս ամենի հետ համատեղ ունենում է նաև ֆիզիկական պատրաստվածություն, ապա այդ դեպքում բանակը միանգամայն շահում է»,- հավելեց ռազմական հոգեբանը:
Հայաստանի քիքբոքսինգի ֆեդերացիայի նախագահ Գառնիկ Հայրապետյանը նույնպես կարևորեց մինչզորակոչային տարիքում ֆիզիկական պատրաստվածության անհրաժեշտությունը և նշեց, որ այս տարի Հայաստանի քիքբոքսինգի ֆեդերացիայում ստեղծել են մարզական լսարան: «Այս լսարանում յուրաքանչյուր մարզիկին ուսուցանվում է բանակի ռազմական տերմինալոգիան, բանակի շարային պատրաստվածությունը: Մենք ամեն ինչ անում ենք, որ մեր մարզիկներին լավ նախապատրաստենք բանակային կյանքին»,- հավելեց նա:
Նա նշեց, որ 3 տարի է արդեն քիքբոքսինգի ֆեդերացիան համագործակցում է Զինված ուժերի հետ և զորամասերում անցկացնում են քիքբոքսինգի առաջնություն: Գառնիկ Հայրապետյանի խոսքով, նախորդ տարի քիքբոքսինգի ֆեդերացիայից բանակ է զորակոչվել 56 մարզիկ, իսկ այս տարի արդեն հոգեբանորեն և ֆիզիկապես պատրաստված 75 մարզիկ է զորակոչվելու բանակ: «Մենք ցանկանում են, որ մեր բանակում և հոգեպես, և ֆիզիկապես շատ ուժեղ տղաներ ծառայեն, որն էլ իր հերթին կխթանի բանակի մարտունակության բարձրացմանը»,- հավելեց նա:
Նա հայտնեց, որ այս տարի քիքբոքսինգի ֆեդերացիան կազմակերպելու է նաև այցելություն այն զորամասեր, որտեղ ծառայում են ֆեդերացիայի սաները: «Մեր այցելության նպատակն է զորամասեր տանել մեր զինվորիների մայրերին, որպեսզի մայրերն իրենք կարծիք ձևավորեն մեր բանակի մասին»,- հավելեց Գառնիկ Հայրապետյանը:
/Panorama.am/
| 
