ՀՀ փոխվարչպետ, տարածքային կառավարման նախարար Արմեն Գևորգյանն այսօր ընդունեց ՀՀ-ում Վրաստանի նորանշանակ արտակարգ և լիազոր դեսպան Թենգիզ Շարմանաշվիլիին:
ՀՀ փոխվարչապետը շնորհավորեց դեսպանին Հայաստանում առաքելությունը ստանձնելու կապակցությամբ և մաղթեց արդյունավետ աշխատանք:
Քննարկվեցին Հայաստան-Վրաստան համագործակցության ընդլայնմանը վերաբերող, համատեղ հետաքրքրություն ներկայացնող հարցեր:
Ա. Գևորգյանը նշեց, որ երկու երկրները դեռևս լիովին չեն օգտագործում փոխգործակցության առկա ներուժը և ակնկալեց դեսպանի աջակցությունը` տարածաշրջանային և տեղական ինքնակառավարման մակարդակում համագործակցությունն ակտիվացնելու ուղղությամբ: Փոխվարչապետը նշեց, որ Հայաստանը հետաքրքրված է Վրաստանում տեղական և տարածքային կառավարման մակարդակում, ընտանեկան նպաստի համակարգում, քաղաքային տնտեսության, ջրամատակարարման համակարգերի կառավարման ոլորտներում փորձի փոխանակման և փոխգործակցության հնարավորություններով:
Ա. Գևորգյանի խոսքով, Հայաստանն ակտիվորեն համագործակցում է Եվրախորհրդի, Եվրահանձնաժողովի և այլ միջազգային կազմակերպությունների հետ, անցած տարի անդամակցել է նաև Եվրոպական ռեգիոնների ասամբլեային: Կազամակերպության անդամ են Վրաստանի հետ սահմանակից Լոռու և Տավուշի մարզերը, ակնկալվում է նաև Շիրակի մարզի անդամակցությունը: Փոխվարչապետը կարծիք հայտնեց, որ միջռեգիոնալ համագործակցությունն ավելի լայն հնարավորություններ կստեղծի եվրոպական կառույցների կողմից տարածաշրջանային ծրագրերի իրականացման առումով:
Նա տեղեկացրեց, որ մարզպետներին առաջարկվել է այցելություններ կազմակերպել Վրաստան և տեղում ծանոթանալ համագործակցության հնարավորություններին:
Դեսպանն իր հերթին պատրաստակամություն հայտնեց նպաստել երկու երկրների միջտարածաշրջանային գործակցության ակտիվացմանը: Նա համաձայնեց, որ երկու երկրների տարածաշրջանների միջև կապերի զարգացման լուրջ ներուժ կա` պատրաստակամություն հայտնելով աջակցել այդ ներուժի բացահայտմանը, ինչպես նաև մարզպետների փոխայցելությունների կազմակերպմանը:
ՏԿՆ հասարակայնության հետ կապերի բաժնից հայտնում են, որ Ա. Գևորգյանը նշեց, որ համակարգի բարեփոխումների փաթեթի մշակման աշխատանքներում հայկական կողմը կօգտվի նաև Վրաստանի փորձից:
/Aysor.am/
| 
