ՀՀ Նախագահ Սերժ Սարգսյանը «Մոսկովսկիե նովոստի» թերթի հետ հարցազրույցում, պատասխանելով հարցին` թե արդյոք մե՞ծ է իրական ռազմական գործողությունների վերսկսման վտանգը, պատասխանել է, որ իր կարծիքով, նման հավանականություն կա, որովհետև ոչ մի կերպ չի կարողանում հասկանալ, թե ինչու է Ադրբեջանը ձգձգում բանակցային գործընթացը: Նրա խոսքերով` հավանաբար, ծրագրեր կան մեծ ուժերի ու միջոցների կուտակման հետ կապված, որպեսզի փորձեն հարմար պահի ռազմական նոր արկածախնդրություն սանձազերծել: Ս. Սարգսյանի խոսքով, դա ճիշտ մոտեցում չէ, որովհետև իրադարձությունները կարող են զարգանալ երկու սցենարով: Առաջինը` տոտալ պատերազմ ու Լեռնային Ղարաբաղի հետագա օկուպացիա, որը հնարավոր է միայն Լեռնային Ղարաբաղի ժողովրդի լիովին բնաջնջման դեպքում: Եվ երկրորդ` Ադրբեջանի պարտություն, ու նրա կողմից նոր տարածքների կորուստ:
«Այդ դեպքում Ադրբեջանը արդեն կսկսի բողոքել ևս հինգ, վեց կամ ավելի մեծ թվով շրջանների կորստից: Իսկ հետո՞: Կրկին հաշտություն, համաձայնագիր, հրադադարի ռեժիմի խախտումներ, նոր պատերազմ… Այս բոլոր սցենարներն անհեռանկարային են»,- ասել է ՀՀ Նախագահը:
Անդրադառնալով այն հարցին, թե ղարաբաղյան հակամարտության կարգավորման վրա ի՞նչ ազդեցություն կունենա Հարավային Կովկասում երկու նոր պետությունների ձևավորումը, Ս. Սարգսյանն ասել է. «Ղարաբաղյան հիմնախնդիրը տարբերվում է բոլոր նմանատիպ հիմնախնդիրներից: Ընդհանարպես այդ բոլոր հակամարտությունները յուրօրինակ են, յուրաքանչյուրն ունի իր առանձնահատուկ պատճառները, հետևանքները, զարգացման դինամիկան: Որպես նախադեպ, իհարկե, աշխարհում նոր պետությունների կայացումը դրական է ազդում Լեռնային Ղարաբաղի ժողովրդի իրավունքի միջազգային ընկալման վրա: Եվ հարցն անգամ այն չէ, թե մենք ինքներս ճանաչո՞ւմ ենք Կոսովոյի, Հարավային Սուդանի, Աբխազիայի կամ Հարավային Օսիայի պետական ինքնիշխանությունը, այլ այն, որ միջազգային հանրությունը տարբեր դասավորությամբ է ընդունում, որ այս կամ այն պայմանների դեպքում անջատումը ինքնորոշման իրավունքի իրացման իրավաչափ ձև է»:
Միաժամանակ ՀՀ Նախագահը հայտարարել է, որ Հայաստանը չի կարող չդիտարկել իր կողմից ԼՂ անկախության ճանաչման հնարավորությունը: Օրինակ, այն իրապես կարող է ծագել ռազմական գործողությունների վերսկսման դեպքում: Ս. Սարգսյանը նշել է, որ ամեն անգամ տալիս են այլ, առավել ուղիղ հարց` «Ինչո՞ւ Հայաստանը չի ճանաչում Լեռնային Ղարաբաղի անկախությունը»: Ըստ ՀՀ Նախագահի` որովհետև մենք բանակցություններ ենք վարում, իսկ Լեռնային Ղարաբաղի ճանաչումը կնշանակի դրանց տապալում:
«Բոլոր դեպքերում ավելի լավ է բանակցել»,- ասել է ՀՀ Նախագահը:
/Aysor.am/
|