ԼՂՀ կառավարությունում տեղի է ունեցել ԼՂՀ վարչապետ Արա Հարությունյանի` ԱրՊՀ-ի տնտեսագիտական ֆակուլտետի ուսանողների հետ հերթական հանդիպումը: Այս մասին տեղեկացնում են ԼՂՀ կառավարությունից: Կառավարության ղեկավարը հանդես է եկել «Գնաճը. սոցիալական վիճակը ԼՂՀ-ում» թեմայով դասախոսությամբ: Վարչապետի կարծիքով` հանրապետությունում վերջին ամիսներին արձանագրված գնաճը պայմանավորված է սպառողական ապրանքատեսակների, հիմնականում, պարենամթերքի ներկրմամբ: Նա ուսանողներին ներկայացրել է գնաճի զսպման վերաբերյալ կառավարության դիրքորոշումը, այդ ուղղությամբ իրականացվող ծրագրերը: Անդրադառնալով պարենային անվտանգության ապահովման պետական քաղաքականությանը` գործադիր իշխանության ղեկավարը անհրաժեշտ է համարում խթանել սպառողական ապրանքատեսակների տեղական արտադրությունը, զարկ տալ գյուղանտեսության զարգացմանը: Ա. Հարությունյանը ուսանողներին պատմել է գյուղատնտեսության և էներգետիկայի բնագավառներում ինչպես իրականացվող, այնպես էլ նախատեսվող ծրագրերի մասին: Մասնավորապես, անդրադարձել է Արցախում ձկնաբուծության զարգացման և բիոէներգետիկայի արտադրության հեռանկարներին: Կառավարության ղեկավարի համոզմամբ` պարենային անվտանգության և էներգետիկ անկախության խնդիրների լուծմամբ հնարավոր կլինի հանրապետությունում ստեղծել սոցիալական կայուն վիճակ: Հանդիպման վերջում Ա. Հարությունյանը պատասխանել է ուսանողների հարցերին:
/Panorama.am/
|