ԼՂՀ բանակցային գործընթացում վերջին շրջանում նկատվող ակտիվությունը ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանի կարծիքով, միայն մեկ նպատակ ունի` կանխել հնարավոր պատերազմը։ Այս մասին Կ. Մանոյանն ասաց այսօրվա ասուլիսում:
Բանախոսը ներկայում պատերազմի հավանականությունը քիչ համարեց, սակայն չբացառեց հնարավոր իրադարձություններ, որոնք կարող են նույնիսկ պատերազմի հանգեցնել: Ըստ Կ. Մանոյանի, պատերազմի վերսկսման հավանականության մասին վկայում են Ադրբեջանի ռազմատենչ հայտարարությունները:
Նա նշեց, որ պետք է Ադրբեջանին հասկացնել` ռազմատենչ հայտարարություններն անընդունելի են, որ չի կարելի այդպես շարունակել ու ժամանակն է վերջ տալու իր «երեխայական խաղերին»։ Ըստ նրա, միջնորդներն ուզում են այնպես անել, որ պատերազմն չվերսկսվի: «Իսկ որ հարցի լուծումը մոտալուտ չէ, դա հաստատ է, քանի որ Ադրբեջանը շարունակում է պնդել, որ ԼՂ-ի ինքնորոշման իրավունքի իրացումը պետք է լինի Ադրբեջանի սահմաններում»,- նշեց Կ. Մանոյանը:
Ըստ այդմ, ՀՅԴ Հայ դատի և քաղաքական հարցերի գրասենյակի ղեկավարը նշեց, որ այսուհետ հայկական կողմը, Հայաստանի իշխանությունները պետք է իրենց դիրքորոշումներում «կոշտ լինեն»: Կ. Մանոյանը գտնում է, որ ժամանակն է հայտարարելու, որ ԼՂ հակամարտության բանակցային գործընթացում Ղարաբաղը պետք է ներգրավվի:
/Panorama.am/
|