ՀՀ կառավարությունն այսրվա նիստի ընթացքում իր երկու որոշումներով մինչև 3 տարի ժամկետով հետաձգել է «Ապառաժ մայնինգ» ՍՊԸ և «Լիկվոր» ՓԲԸ կողմից իրականացվող ներդրումային ծրագրերով ներմուծվող 300-ական մլն դրամը գերազանցող արժեքով հաշվարկվող ԱԱՀ վճարման ժամկետը և հավանություն տվել ՀՀ էկոնոմիկայի նախարարության և այդ ընկերությունների միջև կնքվելիք պայմանագրերի նախագծերին։
ՀՀ էկոնոմիկայի նախարար Տիգրան Դավթյանը ներկայացրեց, որ «Ապառաժ մայնինգը» կառուցում է արդյունաբերական էմուլսիոն պայթուցիկ նյութերի արտադրության ժամանակակից գործարան` իրականացնելով մոտ 453 մլն դրամի ներդրում և ստեղծելով առնվազն 35 նոր աշխատատեղ, իսկ «Լիկվորն» ընդլայնում է իր գործունեությունը և նախատեսում Երևանում կառուցել մոտ 3200 քմ մակերեսով նոր մասնաշենք, տեղակայել մոտ 416.6 մլն դրամ արժեքով դեղագործական արտադրության համապատասխան սարքավորումներ, ստեղծել առնվազն 25 նոր աշխատատեղ։
«Մեր երկրում թափ է առնում դեղագործությունը, ինչի վկայությունն է նաև «Արփիմեդ» ընկերությունում երեկ շահագործման հանձնված հոսքագիծը»,- ընդգծեց վարչապետ Տիգրան Սարգսյանը, հավելելով, որ ընդհանրապես տարբեր ձեռնարկություններին տրվել է շուրջ 25 մլրդ դրամի հարկային արտոնություն և միջոցառումը դրական ազդեցություն է գործում և հաջողությամբ կատարում այն դերը, որը վերապահված է այդ նախաձեռնությանը։
Նիստում, փոփոխելով իր նախկին որոշումներից մեկը, գործադիրը հնարավորություն է ստեղծել, որպեսզի արտոնյալ պայմաններով բժշկական ծառայությունները տրամադրվեն համավճարային սկզբունքի կիրառմամբ, ինչը նշանակում է, որ պետության երաշխավորած ծառայությունների փոխհատուցումը պետք է իրականացվի իրական գներով։
Կառավարությունն իր նիստում հինգ տարով երկարաձգել է «Հայկական ատոմային էլեկտրակայան» ՓԲԸ միջուկային նյութերի ներմուծման արտոնագրի ժամկետը, որը լրացել է 2011թ. փետրվարի 16-ին։
Լոս Անջելեսում ՀՀ գլխավոր հյուպատոսությունն աշխատանք է կատարում գնելու հյուպատոսության շենքը, ինչին աջակցելու խոստում են տվել մի շարք հնարավոր նվիրատուներ։ Եվ քանի որ ԱՄՆ-ն հարկային արտոնություն է տալիս հանրային նպատակներին ուղղված նվիրատուներին, վերջիններս նախընտրում են գումար հատկացնել Հայ առաքելական եկեղեցու կամ «Հայաստան» համահայկական հիմնադրամի միջոցով։ Առաջին մեծ նվիրատվությունը` 250 հզ. դոլար, կատարել է հայտնի գործարար Զ. Թրփանջյանը։ Կառավարության որոշմամբ ՀՀ արտգործնախարարությանը թույլատրվել է ընդունել նվիրատվությունը և այն մուտքագրել արտաբյուջետային հաշվեհամարին։
Գործադիրը 2004թ. ընդունած իր որոշումներից մեկով «Դվին» հյուրանոցային համալիր» ՓԲԸ-ի բաժնետոմսերն ուղղակի վաճառքի ձևով մասնավորեցրել էր «Կովկասյան կոմունիկացիոն խումբ» ՓԲԸ-ին։ Նոր որոշմամբ սահմանվել են ընկերության ներդրումների չափերը և ժամանակացույցը, ըստ որի համալիրը վերակառուցելու, արդիականացնելու և ժամանակակից չափանիշներին համապատասխանեցնելու նպատակով կատարվելու է մինչև 30 մլն ԱՄՆ դոլարին համարժեք դրամի ներդրում, այդ թվում 2011թ.` 2.6 մլն, 2012թ.` 7 մլն, 2013թ.` 4 մլն ԱՄՆ դոլարի չափով։
/Aysor.am/
|