Այսօր կայացել է ՀԱՊԿ շրջանակում նախատեսված միջոցառումների իրականացումը համակարգող միջգերատեսչական հանձնաժողովի նիստը, որը վարել է հանձնաժողովի նախագահ, Ազգային անվտանգության խորհրդի քարտուղար Արթուր Բաղդասարյանը:
Ազգային անվտանգության խորհրդի քարտուղարի մամուլի գրասենյակի հաղորդմամբ, հանձնաժողովի անդամները ներկայացրել են ՀԱՊԿ շրջանակում 2010 թվականին իրենց գերատեսչությունների կատարած աշխատանքը:
Արթուր Բաղդասարյանը գոհունակությամբ նշել է, որ ռազմաքաղաքական այս դաշինքի շրջանակում Հայաստանը 2010 թվականին գործել է բավական արդյունավետ. «Մենք ակտիվ մասնակցել ենք ՀԱՊԿ շրջանակում բոլոր միջոցառումներին, արդյունքում` ստորագրվել է 34 փաստաթուղթ, որոնցից 10-ը` միջազգային պայմանագրեր և համագործակցության համաձայնագրեր: Կարևոր էր հատկապես ռազմաարդյունաբերության ոլորտում մեր համագործակցության ակտիվացումը Ռուսաստանի, Բելառուսի, Ղազախստանի հետ: Ռազմական արտադրանք թողարկող ձեռնարկություններին վերաբերող միջպետական գիտաարտադրական միավորումների ստեղծման մասին համաձայնագրի կնքումն այս ոլորտում համագործակցությունն ավելի խորացնելու նոր հիմք է տալու մեզ: Շատ կարևոր էր նաև արագ արձագանքման հատուկ ստորաբաժանումներին վերաբերող փաստաթղթերի փաթեթի ստորագրումը և 2011 թվականին Հայաստանում այդ ստորաբաժանումների զորավարժություններն անցկացնելու մասին որոշումը»:
Նիստում կարևորվել է, որ այս տարի ՀԱՊԿ արտակարգ իրավիճակների համակարգող խորհրդի և ՀԱՊԿ ռազմատնտեսական համագործակցության միջպետական հանձնաժողովի հայ-ռուսական ազգային հատվածերի համատեղ նիստերը կանցկացվեն Հայաստանում: ՀԱՊԿ անդամ պետությունների թմրամիջոցների ապօրինի շրջանառության դեմ պայքարի իրավասու մարմինների ղեկավարների համակարգող խորհրդի 10-րդ հոբելյանական նիստը ևս կկայանա Երևանում:
Նիստում քննարկվել են նաև ՀԱՊԿ հավաքական անվտանգության խորհրդի 2010 թվականի դեկտեմբերյան նստաշրջանի որոշումների իրագործմանն ուղղված միջոցառումների պլանի նախագծի հետ կապված հարցեր:
/Panorama.am/
| 
