Հունաստանում Հայաստանի դեսպան Գագիկ Ղալաչյանը երեկ հանդիպում է ունեցել Սալոնիկի քաղաքապետ Յանիս Բուտարիսի հետ: Հանդիպմանը ներկա էին նաև Սալոնիկի հայ համայնքի ներկայացուցիչները:
ԱԳՆ մամուլի ևբ տեղեկատվության վարչությն հաղորդմամբ, դեսպան Ղալաչյանը և քաղաքապետ Բուտարիսը քննարկել են Հայաստանի և Հունաստանի մեծությամբ երկրորդ քաղաքների` Գյումրիի և Սալոնիկի միջև կապերի ընդլայնման, մշակույթի, տնտեսության և այլ բնագավառներում փոխշահավետ համագործակցության զարգացման հեռանկարները:
Կողմերը նշել են, որ հայ-հունական երկկողմ հարաբերություններում կարևոր դեր է վերապահված երկու բարեկամ երկրների քաղաքների ու բնակավայրերի միջև համագործակցային կապերի, քույր-քաղաքների հարաբերությունների հաստատմանն ու ամրապնդմանը: Այդ առումով, երկուստեք կարևորվել է Սալոնիկում հնուց ի վեր գոյություն ունեցող հայ համայնքի դերը, որը կարող է երկու քաղաքների «բարեկամության կամուրջ» դառնալ:
Զրուցակիցները նշել են, որ մշակույթի ոլորտում համագործակցությունը կարող է արդյունավետ լինել արդեն հաջորդ տարի, երբ Հունաստանում անցկացվեն Հայաստանի մշակույթի օրերը, իսկ Սալոնիկը նշելու է թուրքական լծից քաղաքի ազատագրման 100-ամյակը: Զրուցակիցները համակարծիք էին, որ փոխշահավետ համագործակցության համար լավ նախադրյալներ կստեղծվեն նաև այս տարվա հուլիսից Սալոնիկը Հայաստանի հետ կապող ուղիղ չվերթի գործարկմամբ:
Դեսպան Ղալաչյանը Սալոնիկի քաղաքապետին է հանձնել Գյումրիի քաղաքապետի կողմից Հայաստան այցելելու հրավերը, որը սիրով ընդունվել է: Պայմանավորվածություն է ձեռք բերվել, որ քաղաքապետ Բուտարիսի գլխավորած պատվիրակության այցը տեղի կունենա արդեն առաջիկա ամռանը:
/Panorama.am/
|