«Մեզ համար Հայաստանը շատ կարևոր է` որպես կայունացնող գործոն»,- այսօր Երևանում ՀՀ նախագահ Սերժ Սարգսյանի հետ հանդիպումից հետո հայտարարեց Լիտվայի նախագահ Դալյա Գրիբաուսկայտեն:
Խոսելով հայ-լիտվական օրակարգի մասին` տիկին Գրիբաուսկայտեն նշեց, որ երկկողմ քաղաքական հարաբերությունները բարձր մակարդակի վրա են, ինչը չի կարելի ասել տնտեսական կապերի մասին:
«Բայց տնտեսական կապերին պայծառ ապագա է սպասվում: Այստեղ մենք պատրաստ ենք ներդրումներ անել և սպասում ենք ձեր ակտիվությանը մեր երկրում»,- նշեց Լիտվայի նախագահը:
Իր խոսքում Լիտվայի նախագահը կարևորեց նաև համագործակցությունը եվրաինտեգրացման համատեքստում: Հայաստանին շնորհավորելով ԵՄ հետ ասոցիացման համաձայնագրի ևս երկու գլուխ հաջողությամբ քննարկելու փաստի առթիվ` տիկին Գրիբաուսկայտեն նշեց. «Լիտվան բարեփոխումների և բանակցությունների հարուստ փորձ ունի, և մենք պատրաստ ենք փոխանցել մեր փորձը»:|
ԵԱՀԿ գործող նախագահող երկրի ղեկավարը նաև հայտնեց, որ իր այցելության օրակարգի երրորդ հարցն առնչվում է միջուկային էներգետիկային, մասնավորապես` այդ ոլորտում անվտանգության ամրապնդմանը: Նա տեղեկացրեց ԵՄ ոկղմից ատոմակայանների «սթրես-թեստեր» անցկացնելու նախաձեռնության մասին և ցանկություն հայտնեց, որ ԵՄ գործընկեր երկրները ևս միանան դրան: Տիկին Գրիբաուսկայտեյի ներկայացմամբ` այս հարցում Հայաստանը պատրաստ է համագործակցության:
/Panorama.am/
|