Եվրոպայի Ռասիզմի և Անհանդուրժողականության դեմ պայքարի հանձնաժողովը հանդես է եկել Թուրքիայում ռասիզմի դեմ օրենքների բացակայության քննադատությամբ: Ինչպես գրում է թուրքական «Հյուրրիյեթը», Թուրքիայի մասին զեկույցում վերոնշյալ հանձնաժողովը խստորեն քննադատել է թուրքական դպրոցներում «Ի~նչ երջանիկ եմ, որ թուրք եմ» որպես երդում աշակերտներին պարտադրվող արտահայտությունը և այն համարել ռասիստական բնույթի:
Ըստ զեկույցի` ազգային փոքրամասնությունների վիճակի բարելավում չի եղել, իսկ կրոնական փոքրամասնությունների նկատմամբ խտրականությունը անհանգստացուցիչ է:
Զեկույցում տեղ գտած հիմնական տեսակետի համաձայն` չնայած քուրդ, գնչու, ալևի և ոչ-մուսուլման կրոնական փոքրամասնությունների խնդիրների լուծման ուղղությամբ Թուրքական կառավարության «նախաձեռնությունները» ուրախալի են, բայց թուրքական օրենսդրության մեջ դեռ ռասիզմի ու խտրականության դեմ պատիժներ չկան: Իսկ ոչ-մուսուլման երեխաները ուսումնառության ընթացքում ուսուցիչների և դասագրքերի հետ կապված խնդիրներ են ունենում:
«Փոքրամասնական խմբերի անդամները, այն դեպքում, նույնիսկ, երբ իրենց տեսակետներն արտահայտում են խաղաղասեր կերպով, այնուամենայնիվ, պատժվում են: Նրանց արտահայտած խոսքերը Թուրքիայում դիտարկվում և դատապարտում են ահաբեկչության դեմ պայքարի օրենքի ենթատեքստում», -ասված է զեկույցում:
/Panorama.am/
|