Տնտեսագետ փորձագետ Մեհեմմեդ Թալըբլըն «Ազադլիգ» թերթի հետ զրույցում ասել է, որ «եթե մի քանի տարի առաջ Ադրբեջանում տնտեսական աճը կազմում էր 30 տոկոս, ապա այժմ այն 5,5 տոկոսից չի անցնում, իսկ վերջին երեք տարիներին ՀՆԱ-ն 5 անգամ աճել-նվազել է` կախված նավթի համաշխարհային գների տատանումներից»:
Հարցազրույցը նա տվել է` ի պատասխան Ադրբեջանի նախագահ Իլհամ Ալիևի այն չարչրկված խոսքերի, թե` «վերջին 7 տարիներին Ադրբեջանում մոտ 1 մլն նոր աշխատատեղ է ստեղծվել, և դրա բացարձակ մեծամասնությունը` ոչ նավթային հատվածում. Ադրբեջանի տնտեսության բարեբեր զարգացումը համաշխարհային ֆենոմեն է»:
Փորձագետի խոսքով, 2008 թ-ից սկսած նոր աշխատատեղերի հարցում, հակառակը, հետընթաց է գրանցվում: «Նոր աշխատատեղեր բացվելու հետ կապված լավատեսական ցուցանիշները շահարկումից բացի, այլ բան չէ: Գլոբալ տնտեսական ճգնաժամի ժամանակաշրջանում նոր աշխատատեղերի աճի վերաբերյալ Ալիևի խոսքերը պապուլիզմ է: Դա իրական վիճակն Ադրբեջանում թաքցնելուն ուղղված ջանք է և ուղղված է միայն ներքին լսարանին»,- ասել է նա:
Տնտեսագետ փորձագետ Իլհամ Հուսեյնլիի կարծիքով, իրականում անհնար է Ադրբեջանում բնակչության մեծ մասի կենսամակարդակը համարել նորմալ:
«Թոշակների մակարդակը մի քանի անգամ ցածր է սպառողական զամբյուղի մինիմալ չափից: Աշխատավարձերն ու թոշակները պետք է հաշվարկվեն սպառողական զամբյուղի մինիմալ չափից ելնելով: Իրականությունը լրիվ հակառակն է, և չարժե խոսել Ադրբեջանում բարեբեր սոցիալ-տնտեսական զարգացումից»,- ասել է Ի.Հուսեյնլին` նշելով, որ անհարմար է խոսել սոցիալ-տնտեսական զարգացումից` կաշառակերության ու կոռուպցիայի մեջ թաղված Ադրբեջանում:
/Panorama.am/
| 
