«Այն, որ Թուրքիան Հունաստանի նախագահից ներողություն է ակնկալում, նրա կողմից թուրքերին բարբարոս է անվանելու համար՝ մեկ բան է ապացուցում. նույնիսկ 100 տարի հետո էլ Թուրքիայի մտածողության մեջ շատ բան չի փոխվել և նրանք դեռևս չեն հասկանում կամ չեն ուզում հասկանալ, որ իրենց պապերը ոչ միայն հայ և հույն ժողովուրդների այլ նաև մարդկային հասարակության նկատմամբ ահավոր հանցագործություն են իրականացրել»,- այս մասին Panorama.am-ին հայտարարեց ԱԺ պատգամավոր, ԱԺ հայ-հունական միջխորհրդարանական բարեկամական խմբի ղեկավար Էդուարդ Շարմազանովը:
Հիշեցնենք, որ Հունաստանի նախագահ Կարոլոս Պապուլիասն Աթենքում Հայաստանի նախագահ Սերժ Սարգսյանին ընդունելու ժամանակ հայտարարել էր, որ հայերին ու հույներին նախորդ դարասկզբին կոտորել է նույն բարբարոսը` թուրքը: Թուրքական լրատվամիջոցները հիստերիկ պաթոսով արձագանքեցին Հունաստանի նախագահի այդ արտահայտությանը` համարելով այն իրենց ուղղված ծանր վիրավորանք:
«Եթե թուրքերը փորձում են ցույց տալ, թե չգիտեն ինչի մասին է խոսքը, ապա հիշեցնեմ, որ 1.5 միլիոն հայ և 600-700 հազար հույն են կոտորել: Որքան շուտ Թուրքիան հաշտվի իր պատմության սև էջերի հետ, այնքան հեշտ կլինի նրա հարաբերությունները հարևանների հետ: Քանի նրանք այդքան «ցավոտ» են արձագանքում իրենց անցյալում տեղ գտած մութ էջերին, նշանակում է, որ իրենք իրենց մեջ լուրջ խնդիրներ ունեն»,- ասաց պատգամավորը: /Panorama.am/
|