2007-ի հունվարի 19-ին Ստամբուլի Շիշլի թաղամասում գտնվող խմբագրատան շենքի առջև զինված հարձակման ենթարկվեց ու սպանվեց պոլսահայ նշանավոր գործիչ, «Ագօս» թերթի հիմնադիր-խմբագրապետ Հրանտ Դինքը: Անցել է արդեն չորս տարի: Դատավարությունը դեռ չի ավարտվել: Մեղավորները դեռ չեն պատժվել:
Այս առնչությամբ իր բողոքն ու հանդիմանանքն է արտահայտել թուրք հայտնի լրագրող ու վերլուծաբան Մեհմեթ Ալի Բիրանդը:
Թուրքական «Milliyet» օրաթերթում հրապարակած «Հրանտի սպանության վրա աչք փակողներն արդեն պետք է պատժվեն» վերտառությամբ հոդվածում Բիրանդը նշում է, որ այդ չլուծված հարցը թուրքական ոստիկանության ամոթի ամենամեծ խարանն է: Հանցագործության կարևոր մանրամասներ բացահայտած Նեդիմ Շեների պես համարձակ լրագրող էլ թե որ չլիներ, ապա, ըստ Բիրանդի, թուրք հասարակությունն այդպես էլ անիրազեկ կմնար, թե ինչու և ինչպես իրագործվեց Դինքի սպանությունը: Բայց դե այսօր արդեն հանրությունը հիմնականում գիտակցում է կատարվածի բնույթն ու բովանդակությունը:
«-Հայտնի էր, որ Հրանտին սպանելու էին: Օրինապահները, սակայն, Հրանտի հայկական ծագման պատճառով կարևորություն չտվեցին այդ հանգամանքին կամ ուղղակի չկարողացան տալ:
-Սպանության նախապատրաստական աշխատանքները ոստիկանությունը գիտակցված կամ չգիտակցված կերպով մատնեց անուշադրության:
-Հետախույզներն էլ անտարբեր գտնվեցին ու իրենց գործը պատշաճորեն չկարողացան կատարել կամ միտումնավոր չկատարեցին»,- գրում է հոդվածագիրը և ընդգծում, որ արդունքում թուրքական պետական մեքենայի անգործության հետևանքով սպանվեց Դինքը:
Ըստ Բիրանդի` այդ հանցագործության պատասխանատվությունը բոլոր այն պաշտոնատար անձանց վրա է, որոնք հաշիվ տալու փոխարեն պարգևատրվել են: Հոդվածի հեղինակը նկատել է տալիս, որ Թուրքիայի ներքին գործերի նախարարությունն այժմ էլ չի կատարում ամենայն անհրաժեշտը` հավանաբար կարծելով, որ հանցագործների հայտնաբերումը վնաս կպատճառի պետությանը: Մինչդեռ, ըստ թուրք վերլուծաբանի, անպայման պետք է լույս սփռվի հանրության մեջ առաջացած հարցերի վրա: «Թուրք ժողովուրդն այսպիս բիծ չպետք է կրի իր վրա, և հանցագործները պետք է պատժվեն»,- եզրափակում է Մեհմեթ Ալի Բիրանդը:
/Panorama.am/
| 
