21 տարի առաջ Բաքվում կազմակերպված ջարդերին մեկ շաբաթում զոհ է գնացել մի քանի հարյուր մարդ: Առայժմ ապացուցված է միայն 300 հայի սպանությունը, սակայն դրանք շատ են: Այսօր լրագրողների հետ հանդիպմանը նման հայտարարությամբ հանդես եկավ «Սովորական ցեղասպանություն» նախագծի ղեկավար Մարինա Գրիգորյանը:
Նրա խոսքով, հայկական կողմը ոչ միայն Բաքվի, այլև Սումգայիթի, Մարաղայի հայկական ջարդերի մասին վկայող հսկայական քանակությամբ փաստաթղթեր, վկայություններ, տեսանյութեր ունի, և ինչքան ակտիվանում է հայկական կողմն իր քարոզչության մեջ, այնքան ադրբեջանական կողմի հայտարարությունները ծիծաղելի են դառնում ու աբսուրդի հասնում: Տեղեկատվական անվտանգության փորձագետ Սամվել Մարտիրոսյանն աբսուրդներից մեկն էլ համարում է այն, որ ադրբեջանցիները նույնիսկ հայտարարում են, թե հայկական Սփյուռքն է Գորբոչովին բերել իշխանության, ադրբեջանցիների կողմից հայկական ջարդեր կազմակերպելու համար, այդպիսով ադրբեջանցիներին թուլացնելու ու նրանցից Ղարաբաղը խլելու նպատակով: Ադրբեջանկան կողմը պետական քարոզչության միջոցով, հսկայական գումարներ ծախսելով, այսօր այն կարծիքն է ձևավորում ու արմատավորում, թե հայերը դրդել են ադրբեջանցիներին իրենց կոտորել, սպանել ու ջարդել, «այսինքն` ջարդարարները սպիտակեցվում են: Դրական դիտվել չի կարող այն, երբ հարևան երկրում դաստիրակվում է ջարդարարների ոգով հասարակություն»:
Մ. Գրիգորյանի խոսքով, նախ պետք է պետական մակարդակով ակտիվացվի քարոզչությունը, մեր կողմն է ճշմարտությունը, դրա համար առկա են բոլոր ապացույցները: Այս առումով պետք է օգտագործել մեր Սփյուռքի հնարավորությունները, ըստ բանախոսի, դրանք այսօր լիարժեքորեն չեն օգտագործված: Մ. Գրիգորյանը միաժամանակ զարմանք հայտնեց, թե ինչու խորհրդարանը չի ճանաչում ադրբեջանցիների կողմից կազմակերպված ջարդերը որպես Ցեղասպանություն, դրանցում առկա են բոլոր այն հատկանիշները, որոնք սահմանված են ՄԱԿ փաստաթղթերով:
Մ. Գրիգորյանի խոսքով, ի վերջո պետք է պետական մարմիները դիմեն միջազգային իրավական ատյաններ ու պատասխանատվության կանչեն Ադրբեջանին: Ըստ նրա, պետք է սկսել Մարաղայի դեպքերից, որոնց իսկությունը վիճարկող հայտարարություններ նույնիսկ ադրբեջանցիները չեն անում, և բացի այդ Մարաղայի ջարդերի ժամանակ արդեն չկար Խորհրդային միությունը, ու կազմակերպիչն ու իրականցնողը հենց Ադրբեջանն էր:
/Panorama.am/
|