21 տարի առաջ հունվարի 13-ին, ժամը 17:00-ից Բաքվում սկսված ցեղասպանությունը չի ավարտվել ու շարունակվում է մինչև օրս: Հայերի նկատմամբ ցեղասպանություն իրագործելը պաշտոնական Բաքվի որդեգրած քաղաքականությունն է, որից Ադրբեջանը ոչ միայն չի հրաժարվում, այլ հրճվում է։ Մինչ այսօր էլ Ադրբեջանում հետապնդվում են հայկական արմատներ ունեցող անձիք, ոչնչացնում են հայկական խաչքարերը։
Ասուլիսում այս մասին ասաց ԱԺ «Ժառանգություն» խմբակցության քարտուղար Լարիսա Ալավերդյանը: Նրա խոսքով, նման քաղաքականություն Ադրբեջանը որդեգրել է հենց իր սկզբնավորման սկզբից` 1918 թվականից ու հրճվանքով շարունակում է մինչև օրս. «Իրեն նախագահ հռչակած Իլհամ Ալիևը ամեն անգամ հրճվանքով է խոսում այն մասին, որ Ադրբեջանը տեսնում է առանց հայերի»: Միջազգային հանրությունն էլ, թեև տեսնում է, որ Ադրբեջանը չի հրաժարվել իր որդեգրած քաղաքականությունից, ըստ բանախոսի, լռում է ու մտադիր էլ այդպես էլ շարունակել:
Հիշեցնենք, որ 1990 թվականի հունվարի 13-19-ը Բաքվում իրականացվել է հայերի ցեղասպանություն: Ցեղասպանության զոհերի թիվը դեռևս հստակեցված չէ: Չճշգրտված տվյալներով` մեկ շաբաթվա ընթացքում Բաքվում սպանվել է շուրջ 300, իսկ բռնի կերպով տարհանվել է շուրջ 30 հազար հայ: Ցեղասպանության արդյունքում զանգվածաբար ոտնահարվել են հայ ազգաբնակչության տնտեսական իրավունքները, կատարվել է հայերի գույքի կողոպուտ ու թալան, բնակավայրերի առգրավում: Հայերը Ադրբեջանում թողել են հարյուր միլիոնավոր դոլարների արժողությամբ գույք` ոչինչ չստանալով որպես փոխհատուցում:
Լ. Ալավերդյանն ասաց, որ հայկական քաղաքական, պատմական ու հասարակագիտական միտքը մինչ օրս կամ ժամանակի կամ էլ նյութերի պակասի պատճառով չի ուսումնասիրել այդ դեպքերը ու չի տվել արժանի գնահատական: «Մենք պետք է սկսենք իրավաբանական մի գործընթաց, որով պետք է պատժվեն ու պատասխանատվության ենթարկվեն այն անձիք, ովքեր մեղավոր են մասսայական սպանությունների մեջ»,- ասաց նա` ընդգծելով, որ մինչև այսօր որևէ հայի իրավունքն չի վերականգնվել, չեն փոխհատուցվել այն կորուստները, որոնք կրել են հայերը:
/Panorama.am/
|
