Երիտասարդական ծրագրերի իրականացման կենտրոնը, ՀՀԿ երիտասարդական կազմակերպությունը, Հայաստանի երիտասարդության ազգային խորհուրդը, Երևանի պետական համալսարանի ուսանողական խորհուրդը, ՀՅԴ «Նիկոլ Աղբալյան» ուսանողական միությունը, ԲՀԿ երիտասարդական հարցերի հանձնաժողովը, Խ. Աբովյանի անվան հայկական պետական մանկավարժական համալսարանի ուսանողական խորհուրդը, ՕԵԿ երիտասարդական միությունը, Երիտասարդական ակումբների դաշնությունը ծրագրում են հունվարի 19-ին ստորագրահավաք կազմակերպել` հնարավորություն տալով հասարակական և քաղաքական միավորումներին միանալ դիմումին, կոչով դիմել առաջադեմ մարդկությանը, ում համար իսկապես թանկ են խաղաղության եւ մարդու իրավունքների հիմնարար սկզբունքները, որպեսզի երկրագնդի որևէ անկյունում նման բարբարոսություններն այլևս տեղ չունենան:
«Յոթ օրվա ընթացքում իրականացվում էին հայազգի խաղաղ քաղաքացիների դաժան սպանություններ, բռնություն, ջարդեր և կողոպուտ, որոնք ամփոփվեցին Բաքվի 250 հազար հայության ամբողջական արտաքսմամբ: Ադրբեջանական իշխանությունների հակահայկական քաղաքականությունը` սկսած 1988թ. Սումգայիթում, այնուհետ Կիրովաբադում (Գանձակ) (1988թ.), Բաքվում (1990թ.), «Կոլցո» օպերացիայի ընթացքում (1991թ.), Մարաղայում (1992թ.) և նախկին Ադրբեջանական ԽՍՀ բոլոր բնակավայրերում, տարածաշրջանի սահմաններից դուրս (Բուդապեշտ 2004թ.) չի դադարում մինչ օրս` ձեռքբերելով նորանոր ու ավելի սպառնացող ձևաչափեր»,-ասված է դիմումի մեջ:
Դեռևս 1990թ. հուլիսի 27-ի «Նյու Յորք թայմս» թերթում Խորհրդային Միությունում հակահայկական ջարդերի կապակցությամբ հրատարակված միջազգային իրավապաշտպան, հասարակական և գիտական ավելի քան 100 ակնառու գործիչների կողմից ստորագրված միջազգային հանրությանն ուղղված բաց նամակում Բաքվի դեպքերին տրվել է հստակ և համարժեք գնահատական: «Մեր նպատակն է միջազգային հանրությանը տեղեկացնել մարդկության ապագայի համար շարունակական վտանգի մասին, որ ներկայացնում է ռասիզմի այդօրինակ տարատեսակը»:
Ցավոք, պատեհաժամ այդ ահազանգը չարժանացավ համարժեք արձագանքի: Հենց դա է մեզ ստիպում այսօր` Բաքվի հայերի ցեղասպանության 20-ամյակի օրերին, պահանջել ճանաչել և դատապարտել ռասիզմը պաշտոնական գաղափարախոսության ու քաղաքականության աստիճանի բարձրացրած և տարածաշրջանին նոր ցեղասպանություններով սպառնացող Ադրբեջանի կողմից իրագործված մարդկության դեմ հանցագործությունը: Վերականգնել Ադրբեջանից վտարված գրեթե կես միլիոն հայության, ինչպես նաև այլ ազգությունների տասնյակ հազարավոր ներկայացուցիչների իրավունքները, ովքեր ստիպված էին լքել Ադրբեջանը ռասիզմի սանձարձակության ժամանակահատվածում: Հարգել Լեռնային Ղարաբաղի ժողովրդի ազատ ու անվտանգ գոյության և ժողովրդավարական զարգացման իրավունքը:
«Աշխարհի պետությունները պետք է ապացուցեն իրենց հավատարմությունը մարդու իրավունքների պաշտպանությանը: Անտարբերությունն ու լռությունն այս դեպքում կարող են նոր ցեղասպանության պատճառ դառնալ»: Բաց նամակի հեղինակների այս խոսքերն այսօր ավելի քան արդիական են: Այսօր` 20 տարի անց, այս նախազգուշացումը վերջապես պետք է դառնա կոչ ի գործողություն բոլորին, ում համար իրապես թանկ են խաղաղության եւ մարդու իրավունքների իդեալները»,-ընդգծում են հասարակական-քաղաքական կազմակերպությունները: Արմենպրես
