«Մենք այսօր կարող ենք և իրավունք ունենք հպարտանալ մեր բանակով: Բանակն այն է, ինչ մենք դարեր շարունակ չենք ունեցել, և մեր բանակն այսօր կայացած է: Իմ խորին համոզմամբ` պետական կառույցների մեջ` ամենակայացածն է»,- այսօր Aysor.am-ի հետ զրույցում հայտարարեց ԱԺ փոխնախագահ Սամվել Նիկոյանը:
Նա նշեց, որ այսօրվա խորհուրդը շատ մեծ է, քանի որ հայ ժողովուրդը դարերի տառապանք ունի, միշտ կերակրել է ուրիշի բանակին և նրա անվտանգությունը կամ վտանգը կախված է եղել ուրիշի բանակից:
Ս. Նիկոյանն ընդգծեց, որ առաջին անգամ մենք կարողացանք շատ իմաստուն գտնվել և 90-ականների սկզբին շատ արագ առաջին ֆիդայական ջոկատներից կազմավորել Հայկական բանակը. «Բոլորը շատ հստակ հասկանում էին, որ ազգի և պետության անվտանգության առաջին երաշխավորը ազգային բանակն է»:
Ս. Նիկոյանը շեշտեց, որ այս օրը տոներից ամենաբարձրն ու մեծն է. «Մենք ունենք ձեռքբերում. առաջին անգամ դարերի ընթացքում Հայոց բանակը կարողացել է ազատագրել իր տարածքների մի փոքր մասը, և մինչ այժմ մեր բանակը կարողանում է պաշտպանել մեր ազգային ինքնությունը և անկախությունը, ժողովրդին և հայրենիքը»:
ԱԺ փոխնախագահը Բանակի օրվա կապակցությամբ շնորհավորեց բոլորին` ժողովրդին, զինծառայողներին, հրամանատարական կազմին, ՊՆ նախարարին, ԶՈՒ Գերագույն հրամանտարին:
/Aysor.am/
| 
