Ադրբեջանահայերի լիազոր ներկայացուցիչների համագումարի կազմկոմիտեն փախստականների բողոքներ և այլ փաստաթղթեր է ուղարկել ԼՂ հարցով ԵԽԽՎ ենթահանձնաժողովին: Այսօր ասուլիսի ժամանակ այդ մասին հայտնեց Քաղաքական, կրոնական և ազգային խմբերի` Ադրբեջանի փախստականների լիազոր ներկայացուցիչների համակարգող խորհրդի քարտուղար Էդուարդ Պոլատովը:
«Մենք նամակներ ենք տվել մեր պատվիրակությանը, որոնք պետք է փոխանցեն ենթահանձնաժողովին: Մենք էլ ենք այնտեղ հարցեր ներկայացրել: Սակայն դեռ տեղյակ չենք մեր հարցերը տեղ հասել են, թե` ոչ»,- ասաց նա:
Ըստ բանախոսի` ԼՂՀ-ի պատվիրակության ներկայությունը Ղարաբաղի հարցով ենթահանձնաժողովին պարտադիր է, և Հայաստանի Հանրապետությունը պետք է աջակցի ԼՂՀ-ին այդ հարցում: Է. Պոլատովի կարծիքով` Լեռնային Ղարաբաղի ներկայացուցիչները պետք է բարձրաձայնեն նաև Ադրբեջանի մյուս ազգային փոքրամասնությունների ճակատագրի մասին:
«Ինչու՞ է պակասել թալիշների թիվը, որոնք հայերից հետո երկրորդ ազգային փոքրամասնությունն էին Խորհրդային Ադրբեջանում: Այսօր հազիվ 70 հազար մարդ է թվագրվում: Որտե՞ղ են ուդիները: Նրանց մեծ մասը, ազգանվան մեջ ունենալով «յան» վերջածանց, հալածվեցին` առանց ազգային պատկանելությունը պարզելու»,- նշեց խորհրդի քարտուղարը:
Նա հիշեցրեց, որ ժամանակին Ադրբեջանը ստեղծվել էր որպես ինտերնացիոնալ պետական կազմավորում, որտեղ բնակչության զգալի մասը հայերն ու «մահմեդականներն» էին կազմում:
Ըստ բանախոսի` ազգերի ուծացման քաղաքականությունը մեկնարկել էր Ստալինի հրահանգով` 1936-թվականից, որին զոհ գնացին ոչ միայն հայերը, այլ նաև բոլոր ազգային փոքրամասնությունների ներկայացուցիչները` ուդիները, թալիշները, թաթերը, ավարները, լեզգիններն ու մյուսները:
«Նման վիճակում միայն մի ելք է մնում` թոթափել հակաժողովրդավարական ազգայնական այս ռեժիմը և ստեղծել Մերձկասպիական համադաշնություն, որտեղ բոլոր ազգային խմբերը կկարողանան հաշտ և փոխադարձ հարգանքով ապրել», - նշեց Է. Պոլատովը: /Aysor.am/
| 
