ԵՐԵՎԱՆ, 25 հունվարի. /Նովոստի-Արմենիա/. Կարևոր է ղարաբաղյան հակամարտության գոտում արյունահեղություն թույլ չտալ, կարծում է ռուս փորձագետ, Քաղաքական կոնյունկտուրայի կենտրոնի գլխավոր տնօրեն Սերգեյ Միխեևը։
«Հայերը Ղարաբաղն իրենց տարածքն են համարում և այնտեղից չեն պատրաստվում հեռանալ, ադրբեջանցիները նույնպես Ղարաբաղն իրենց տարածքն են համարում և չեն կարող հաշտվել, որ տարածքն անկախ կլինի։ Ոչ մի համաժողով և սեմինար այստեղ չի օգնի, քանի որ այստեղ կողմերի դիրքորոշումների համատեղում չկա... Կարևոր է լայնածավալ արյունահեղություն թույլ չտալ, իսկ այն կարող է լայնածավալ լինել, առավել լայնածավալ, քան որոշ մարդկանց թվում է»,- երեքշաբթի «Ղարաբաղյան հակամարտության կարգավորումը։ Եռակողմ հանդիպման արդյունքները» թեմայով Երևան-Մոսկվա տեսակամուրջի ժամանակ ասաց Միխեևը։
Ըստ փորձագետի՝ համաժողովների և սեմիներների ժամանակ որքան ցանկանում ես, կարող ես քննարկել Ղարաբաղի հարցը, բայց դրանից հետո հայերը պատրաստ չեն լինի հրաժարվել տարածքից, իսկ ադրբեջանցիները՝ այն պահանջելուց։
«Այդ պատճառով պետք է բանակցել և կենտրոնանալ այն հարցի վրա, որը կարևոր է՝ լայնածավալ արյունահեղություն թույլ չտալ։ Դա իրական բան է, որը գտնվում է իրական քաղաքականության հարթությունում։ Այդ մասին կարելի է խոսել, քննարկել, առաջարկներ անել, բայց, ցավոք, դեռ մենք կողմերի դիրքորոշումների անհամապատասխանություն ենք տեսնում, ինչը չի թողնում առաջ ընթանալ»,- ասաց Միխեևը։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:
/Newsarmenian.am/
| 
